A lo llargo la historia, la evolución de la música asturiana foi paralela a otres corrientes sonores que se taben dando n’otros contestos en distintos momentos. Dalgunos exemplos d’esto son qu’a primeros del pasáu sieglu’l Nacionalismu Musical tuvo tamién una espresión asturiana; na década de los setenta surdió’l Nuevu Canciu Astur, daqué asemeyao a la canción d’autor que se taba dando n’otros territorios con llingua propia; la manera de trabayar colos soníos de raigañu dende la perspectiva del celtismu aportó tamién a Asturies; el pop llariegu ye un fenómenu que tien homólogos per tol mundu; o los grupos del rock astur siguieron un camín paecíu al d’otres bandes combatives d’otros países.
Nestos momentos ta viviéndose una revolución musical. L’andanciu del Covid-19 y les sos consecuencies, el surdimientu de nueves músiques, l’auxe del feminismu, la reivindicación de la identidá propia o la entrada na mayoría d’edá de la Xeneración Z -aquella nacida aproximadamente ente 1997 y el 2012-, son dalgunes de les razones que despliquen una manera nueva de facer y consumir música ente la xente más nuevo. N’Andalucía, en Galicia, nel País Vascu, en Valencia… nun aparen de surdir proyectos musicales novedosos que frayen col dogmatismu, cola ortodoxa, coles etiquetes. Que faen canciones mirando pa la so identidá llingüística y cultural y na que pue sentise una montonera d’influencies que van del punk al pop pasando pel trap, el reggaeton o la música de raigañu de cada territoriu.
«L’andanciu del Covid-19 y les sos consecuencies, el surdimientu de nueves músiques, l’auxe del feminismu, la reivindicación de la identidá propia o la entrada na mayoría d’edá de la Xeneración Z -aquella nacida aproximadamente ente 1997 y el 2012-, son dalgunes de les razones que despliquen una manera nueva de facer y consumir música ente la xente más nuevo»
N’Asturies, esa fola ta aportando. Llega tarde, con pocos referentes y muncho camín per delantre. Pero los pasos pal surdimientu d’una música asturiana nueva yá entamaron a dase; y hai dos nomes qu’anguaño tán llamaos a encabezar esti movimientu: Llevólu’l Sumiciu y Ferla Megía. Son xóvenes -nacieron ente 1993 y 1999-; almiren la so obra mutuamente; tienen referentes musicales en común; trabayen cola tradición dende una perspectiva nueva na que los soníos electrónicos son los protagonistes; formen parte de la mesma axencia de contratación -la recién creada Lacre, con sede n’Uviéu-; y en payares d’esti 2024 asoleyaron caún el so EP, La Llobera y Páxaros 01, de los que nacen un total d’once temes que traen frescura, orixinalidá y renovación a la música’l país.
“Yo quería ser heavy en plan tocar en Megadeth. Esi yera’l mio suañu”, diz ente rises Ferla Megía sobre los oríxenes musicales. Llueu llegó-y el gustu por Nirvana, tocó en Casetes -“un grupu de lo qu’agora llamen ‘tontipop’”, esclaria-, y más tarde influyó-y la música minimal n’inglés y nomes como Frank Ocean y James Blake. De telón de fondu na casa de la so familia siempre tuvo presente “la música d’autor llatinoamericana, la nueva trova cubana, la canción protesta chilena, Extremoduro y Platero y Tú”. La evolución de los hermanos Pablo y David Alonso de Llevólu’l Sumiciu tamién tien semeyances: d’adolescentes tuvieron un grupu de rock llamáu Flacidez Extrema y llueu montaron Entropía, una banda de metal extremu. Baxo esos referentes musicales curtiéronse n’otros proyectos, faciendo música en castellanu o n’inglés y ensin identidá asturiana; hasta qu’en 2020 aproximadamente aporten a la escena de la música n’asturianu.
«Entamé a facer música n’asturianu sobre manera por tener que colar fuera, por vivir en Galicia y Cataluña y ver xente ellí faciendo música más rellacionada cola so cultura. Amás esto ayudóme muncho cola señaldá, porque facía coses que me recordaben a casa»
Un 2 de payares de 2020 Llevólu’l Sumiciu publicaron na so canal de YouTube’l videoclip de “Saldiguera”. Con una propuesta audiovisual mui cuidada y una música que, como ellos reconocen, bebía d’esperiencies anteriores como la de Fruela 757, Tutu Studiu 07 o Soncai System, refixeron esti tema tradicional en clave de reggaeton y electrónica. Güei ye ún de los “hits” d’un dúu que nació, como munches otres coses, de la señaldá que siente la mocedá asturiana cuando ta emigrao. Asina lo desplica Pablo Alonso, productor del grupu: “Entamé a facer música n’asturianu sobre manera por tener que colar fuera, por vivir en Galicia y Cataluña y ver xente ellí faciendo música más rellacionada cola so cultura. Ver esi tipu de proyectos con otres cultures fízome querer facer dalgo asina cola mía. Amás esto ayudóme muncho cola señaldá, porque facía coses que me recordaben a casa”.
Per otru llau, Ferla Megía cantó per primer vez n’asturianu a entamos de 2023 cuando asoleyó’l tema “Ni bajo el mar”. La motivación pa usar la llingua propia vino gracies a Rodrigo Cuevas: “En 2019 salió ‘Manual de Cortejo’ y xente como yo, que nun taba averada a la música asturiana, entendimos lo que yera aquello y lo guapo que yera. Tardé n’entendelo, pero dende ehí entamé a deprender baille asturianu, a tocar la pandereta y a facer música n’asturianu”, desplica esti xoven músicu sierense que d’entós pacá foi publicando singles en plataformes dixitales. Lo mesmo que los castrillonenses Llevólu’l Sumiciu, que nesti tiempu llanzaron l’EP Entaína (2021), participaron nos compilatorios Al Son del Cantar (2022), Semando Son y Codex Futura, Vol. 3; y fixeron un remix de “Ente la niebla” de Dixebra -estes tres últimes referencies en 2023-.
«En 2019 salió ‘Manual de Cortejo’ y xente como yo, que nun taba averada a la música asturiana, entendimos lo que yera aquello y lo guapo que yera. Tardé n’entendelo, pero dende ehí entamé a deprender baille asturianu, a tocar la pandereta y a facer música n’asturianu»
El dúu d’electrónica de raigañu publicó esti añu La Llobera, el so segundu EP. Nél rescampla una madurez del so soníu, una propuesta más rítmica y la inclusión per primer vez de composiciones orixinales dafechu nos cortes “Nacida de la bruma”. Esti tema tien dos partes -qu’abren y piesllen l’EP- y nél pon voz y lletra Neurora, cantante que yá collaborara con ellos en “Ronzón”. Tamién collabora la xoven intérprete d’asturianada Alicia Villanueva na post-vaqueira “Medio la mar” y suena sampleada la voz de Mapi Quintana y del cantador Juanín de Mieres n’otros temes. Ritmos afrollatinos, dembow, jersey club y más soníos electrónicos améstense a la tradición sonora asturiana nestes cinco pieces.
«En La Llobera rescampla una madurez del soníu, una propuesta más rítmica y la inclusión per primer vez de composiciones orixinales dafechu»
Otra de les novedaes ye que ye un álbum conceptual. El puntu d’alcuentru ye la lleenda d’Ana María García ‘La Llobera’, llanisca xulgada doblemente nel sieglu XVII: pola inquisición y pola sociedá, que nun aceptaba qu’una muyer quixere ser llibre, tamién no tocante a l’amor. D’esta manera, Llevólu’l Sumiciu escoyeron temes de los que yá teníen fechos que pudieren rellacionase con esta historia y les lletres de “Nacida de la bruma” traten esta cuestión, incluyendo amás pasaxes del cómic ‘Ana María. La llobera d’Asturies’, obra cola que Guillermo Menéndez Quirós algamó’l Premiu Alfonso Iglesias de Cómic en 2022.
D’otra banda, Páxaros 01 de Ferla Megía ye un trabayu más sele y intimista nel que l’artista fusiona xéneros como’l hiphop, pop, trip hop, ambient, trap, folk tradicional, boleru o canción d’autor. Too ello “fecho dende la perspectiva de daquién que forma parte d’una xeneración que lo tien complicao y que fai música como una manera de soltalo too fuera”. Un exemplu d’esto ye “Medrana a medrar”, tema col que tuvo nomináu esti añu al Premiu Camaretá al Meyor Cantar en Llingua Asturiana y que, como sorraya Ferla, reflexa “esa sensación de frustración respecto al futuru. Un futuru que pinta bastante feu cola cuestión climática o la de la vivienda”.
«Páxaros 01 ye un trabayu más sele y intimista nel que l’artista fusiona xéneros como’l hiphop, pop, trip hop, ambient, trap, folk tradicional, boleru o canción d’autor»
En cuantes al procesu compositivu, los dos creadores comparten inquietúes, metodoloxíes, recursos y intereses. Usen samplers mui estremaos, recurren al Atlas Sonoru de la Llingua Asturiana, a grabaciones que faen ellos mesmos esbillando soníos de cuando paseen pel monte o cuando van a un chigre… y el fechu de llendar les composiciones a daqué “que tea enraigonáu a la música asturiana” ayuda qu’estes mentes inquietes nun pierdan el focu a la hora de componer les canciones.
“A mí tresmite mogollón esti últimu EP, ye un esperimentu íntimu que me mola muncho”, opina Pablo Alonso sobre la obra nueva de Ferla Megía. Pela otra banda tamién hai alabances: “dende’l primer momentu que sentí a Llevólu’l Sumiciu pensé qu’esto nun se taba faciendo n’otra parte y que si nun s’esplotaba diba perdese un proyectazu”. El reconocimientu mutuu sigue nesta conversación con frases como “Ye una pasada que Llevólu’l Sumiciu tea n’Asturies afincáu y que seya exemplu pa la música que se ta faciendo equí”; “A nivel de vanguardia lo que ta faciendo Ferla ye una cosa que me flipa y más que se faiga n’Asturies”. En rellación a esto último, Alonso abri l’alderique: “l’únicu problema ye que creo qu’una propuesta como la de Ferla en Barcelona lo petaría muncho y n’Asturies ye una pena que nun haiga más públicu pa valorar estos proyectos más de vanguardia”, a lo que Megía respuende con optimismu: “Habrálu. Si nun se faen proyectos d’esti calter, nun va haber públicu enxamás, por eso ye importante que se faigan y apoyalos”.
«Ye más natural que surdan grupos de punk-rock n’asturianu porque hai xente mozo que medró sintiendo a Dixebra o a La Tarrancha, entós ye más cenciello continuar esi camín. Pero si nun se faen proyectos d’esti calter, nun va haber públicu enxamás, por eso ye importante que se faigan y apoyalos»
Precisamente, una de les cuestiones que se ponen enriba d’una mesa nesta conversación ye si ta naciendo una escena de música asturiana nueva, como la que ta xorreciendo n’otros países o como la que surdió enantes n’otros estilos de la música’l país como’l folk o’l rock astur. “Dende que nació’l Semando Fest yo pienso que sí. Nun sé si’l nivel de consolidación ye abondo como pa decir qu’hai una escena como tal, pero cuido que nel momentu que faes un bolo nuna sala, la xente paga por una entrada, y tolos artistes tienen en común varies coses, yo creo que daqué hai. Y nun foi una cosa puntual, porque cuando tocamos l’añu pasáu en La Salvaje tamién enllenamos la sala y esti añu tenemos la misión de repetir lo mesmo tocando Llevólu’l Sumiciu y Ferla Megía nesa mesma sala. Entós ehí veremos si polo menos ye una escena que se caltién medrando a esti ritmu; anque eso nun quita pa que falten más nomes”, opina Pablo ‘Sumiciu’. “Yo tamién creo que faen falta más grupos pa que se faiga más madura la escena, pero tamién pienso qu’hai una demanda y que de xuru qu’hai munchísima xente faciendo coses mui interesantes, pero qu’a lo meyor tovía nun les publicaron, que les faen pa ellos y yá ta”, plantega Ferla.
«Nun sé si’l nivel de consolidación ye abondo como pa decir qu’hai una escena como tal, pero cuido que dalgo hai»
Dambos destaquen el llabor aglutinante de la so axencia de contratación, Lacre, que “supo ver qu’equí hai daqué nuevo y qu’hai que trabayar con ello porque hai qu’aprovecharlo”, como diz Megía, y reconocen lo interesante d’otros proyectos musicales mozos d’Asturies, anque nun usen l’asturianu. ¿Por qué nun lo faen? Pa Pablo Alonso ye “pola falta de referentes” y desplícalo asina: “Ye más natural que surdan grupos de punk-rock n’asturianu porque hai xente mozo que medró sintiendo a Dixebra o a La Tarrancha, entós ye más cenciello continuar esi camín. Pero yo hasta que nun viví en Galicia y Barcelona fici música en castellanu porque yera la opción ‘por defecto’; nun nos plantegábemos otra cosa porque nun había referentes que ficieren n’asturianu metal extremu o otra música que nos prestaba”.
Sicasí, esos referentes agora son ellos. Llevólu’l Sumiciu y Ferla Megía son la herencia de pioneros como Fruela 757, Mus, Sergio Rodríguez, Rodrigo Cuevas, Herbamora, o los temes que suenen nel compilatoriu Asturlletric; y trabayen nel presente con ganes, ilusión y munchos planes de futuru. Ferla ta preparando Páxaros 02, un EP nuevu enllenu de collaboraciones; y Llevólu’l Sumiciu diseñando dos espectáculos estremaos pa los sos directos. Son la punta de llanza d’una escena, qu’anque ye embrionaria, pue afirmase qu’existe. Va cuatro años nun había nengún escenariu que los axuntara; güei tienen públicu qu’enllena sales pa velos. Quiciabes, dientro de cuatro años, la Xeneración Z siguirá aportando a la música asturiana y habrá más bandes moces que se puedan enmarcar dientro d’esta escena inda ensin nome. Nesi hipotéticu momentu, ellos serán los referentes, cumpliendo’l mesmu papel que grupos como Llan de Cubel o Dixebra tuvieron pa bandes como Felpeyu o Skama la Rede. La llinia sigue trazada; la música asturiana sigue evolucionando.
Suscríbite a les nuestres novedaes
