Va delles selmanes enterámonos de que Laura Ruiz, Mónica Vega y Candela Pidal taben grabando un discu con cantares de boda, asina que, ensin duldalo, contautamos con elles pa poder acompañales mientres una tarde. El llunes 14 d’abril, aportamos a los Estudios 15:40 de Perdones (Gozón) y recíbenos, otra vuelta, Senén Fernández. Ye la segunda vez que venimos a estorbar y tenemos la suerte de poder sentir dalgunos avances de temes que van llanzase nos meses vinientes. Nesi intre lleguen les tres pandereteres xunto a Fernando de la Puente y tola ferramienta: carpetes, panderetes, pandeiros y la voz nel sitiu.
Cuéntennos, lo primero de too, qu’esti discu va tener un calter divulgativu, con unes 16 o 17 reproducciones de cantares de boda antiguos nos que van sonar versiones tradicionales con percusión y voz; y otres más modernes, con otra instrumentación y collaboraciones prestoses como les pandereteres del Grupu de Baille Tradicional Fitoria -que dirixe Laura y nel que participen tamién Mónica y Candela- con otres compañeres del GFI El Ventolín, la bandina Los Gascones, Dani Álvarez y dalguna sorpresa más qu’entá nun pueden desvelanos. Enantes de cada pista van poder sentise, a mou d’incipit, cachinos de les grabaciones orixinales de cada cantar, interpretaos poles muyeres que decidieron compartilos.
«El discu va tener un calter divulgativu, con más d’una quincena de reproducciones de cantares de boda antiguos onde van sonar versiones tradicionales con percusión y voz, y otres más modernes con collaboraciones»
La idea surdió de Fernando de la Puente Hevia, investigador etnográficu y profesor na Escuela de Música Tradicional Asturiana ‘Manolo Quirós’ d’Uviéu, que lleva a les sos espaldes munches publicaciones sobre les espresiones tradicionales y populares de la música y el baille asturianos. «Vamos a clase con él les tres y propúnxonos facer esti discu porque tenía munchu material y, como nun hai malpenes trabayos sobre ello, paeciónos una bona idea», desplica Laura. Anque non siempre quier pronunciase nesti tipu de contestos, Fernando anímase a contanos cuál ye’l so papel nel proyectu: «Yo soi el documentalista, el que tien les grabaciones orixinales y fai un estudiu sobre los cantares de boda na época na que se cantaben pa les bodes».
«La boda yera un momentu determinante dientro de la vida de la mocedá, la sociedá y los pueblos. Creí importante asoleyar esti tipu de cantares. Yo yá ficiera grabaciones monográfiques col grupu Xana de Perlora y equí había un material bayurosu que yera una pena que nun se divulgara», comenta Fernando. Con esa cantidá grande de grabaciones, entrugámonos pol procesu y los criterios pa esbillales y escoyer les que fueren más interesantes pa incluyir nel discu. Ye Fernando quien nos contesta otra vuelta: «Hai munchos que son variantes, sería mui repetitivo melódicamente, asina qu’intentamos buscar la mayor diversidá melódica. Amás, non tolos cantares interprétense con cuartetes octosilábiques, hai otros que son con seguidilles… diferentes maneres d’interpretar el cantar».
«La boda yera un momentu determinante dientro de la vida de la mocedá, la sociedá y los pueblos. Tenía un material bayurosu sobre esti tipu de cantares y yera una pena que nun se divulgara»
Aprovecha tamién pa danos más información d’esta tipoloxía que, siendo sinceres, desconocemos: «La melodía de los cantares de boda ye un reflexu de la música qu’empleguen pal baille. Suelen ser davezu una inspiración d’otra melodía qu’emplegaron pal baille, mesmo pa muñeira que pa baille d’arriba. De fechu, llámenlu a veces baille d’arriba de boda». «Nun pertenez namás al ámbitu xeopolíticu asturianu, sinón que tamién hai cantares de Babia, L.laciana y tamos pensando, incluso, en meter dalgo de más p’abaxo, d’Astorga o perhí», desplica. N’acabando la fras reímonos con complicidá porque teníemos nidio, namás lu vimos entrar pela puerta del estudiu, que, anque normalmente prefier ser prudente, la so pasión pola investigación de la tradición asturiana diba llevalu a garrar el micrófonu -lliteral y metafóricamente- y tresmitinos tolos sos saberes sobre’l tema. Una suerte.
Candela coméntanos que ye’l quintu día que vienen al estudiu, onde suelen siguir el mesmu procesu en toles ocasiones, y qu’amás pudimos atestiguar. Ente broma y broma sobre quién ye la más y la menos curiosa coles partitures, entama la producción. El primer pasu ye comunicar el títulu del cantar y ponelu en contestu: ‘Camino a la nueva casa’. Una vez fecho eso y con teléfonu en mano, Mónica reproduz a la vera del control una grabación casera d’ensayu pa que Senén pueda preparar les guíes que necesiten pa interpretar con precisión, comodidá y seguridá. D’esa manera, amás de conocer la melodía, él prepara una referencia tonal y metronómica pa que, darréu d’ello, Laura entre na cabina a grabar una especie de demo cola pandereta de los toques que faen mientres la introducción, estrofa y remate.
Esa nota pedal, un tonu fundamental midi, que preparara Senén y que tovía nun emplegaren ye lo que-yos sirve, xunto colos toques de pandereta de Laura, pa grabar les voces, cantando toes al mesmu son, estrofa per estrofa, sele y ensin priesa, repitiendo les veces que faiga falta p’algamar la calidá que quieren. La percusión que va sentise nel discu -non la prueba que grabara Laura- vendrá dempués a completar la pieza y, como diz Candela ente rises, «cuando salimos equí, Sénen organízalo too y queda perfecto». Ye ablucante ver cómo nun sitiu con «esta pila botones, que cualquiera sabe cuál ta apagáu», como bromea Candela, sigue faciéndose un trabayu d’artesanía, anque la tecnoloxía lu facilite y axilice.
Como comentamos al entamu d’esti reportaxe, esti trabayu discográficu nun va ser un productu comercial como tantos otros que se graben nesti y n’otros estudios. Trátase d’un discu de calter divulgativu que requier d’un procesu de producción, post-producción y promoción diferentes porque ta fecho col envís d’aportar, compartir y esparder conocimientu y caltener el patrimoniu que contién, nesti casu, cantares de boda. Anúnciennos que del procesu de diseñar la identidá gráfica del álbum va encargase Antón Barquero, que tamién toca nél con Los Gascones.
«El día de la boda yera un día especial pa los que se casaben. Poro, tolos temes tienen una lóxica temporal dientro d’esi día. Pa la muyer ye un día triste porque va dexa pa siempres la casa de sos padres y por eso necesita que les sos compañeres, hasta esi momentu, l’arropen. Dexen de ser compañeres pa ser amigues, cambia l’estatus. Esi procesu de dir a la casa de la que va ser la futura suegra implica munchu cuidáu, suavizar caún de los momentos, y creo que ye importante desplicalo», confiesa Fernando. Esta ye una de les munches razones que tienen pa pensar nuna posible presentación del discu como un formatu d’espectáculu nel que tea presente lo didáctico y divulgativo.
«El día de la boda yera un día especial pa los que se casaben. Los temes tienen una lóxica temporal y amuesen el procesu d’acompañamientu a la novia. Creo que ye importante desplicalo»
Anque nun tienen priesa por asoleyalo, porque lleven unos meses nel estudiu pero esti proyectu entamó va dos años, marchamos con gana de poder sentir el resultáu d’esti llabor fondu d’investigación y interpretación. Agradecíes por que Senén Fernández volviera a acoyenos nos Estudios 15:40 y pudiéremos apreciar el so ciñu y profesionalidá; por que Fernando de la Puente quixere regalanos esti ratín de deprendizaxe; y por que Laura, Mónica y Candela nos dexaren sentir en primicia ún d’estos cantares y incordiar nuna de les sos tardes de grabación. Gracies por nun dexar morrer adulces el nuestru patrimoniu musical y cultural.
Suscríbite a les nuestres novedaes
