La recién creada asociación de folclore La Flor de Grau ta acabante d’anunciar a qué persona van gallardonar col I Premiu La Flor de Grau. La escoyida ye «la gran Mariluz Cristóbal Caunedo, referente indiscutible de la tradición y del folclore asturianos«, como argumenten dende la entidá. El próximu sábadu 26 d’abril a les 19h na Capieya Los Dolores de Grau va ser la entrega del premiu.
«Vamos facer un reconocimientu anual nel tiempu de la primer Flor nel qu’agradezamos l’enfotu de persones y organizaciones que lleven tola vida calteniendo’l folclore y tresmitiéndolo a les xeneraciones nueves. Un enfotu desinteresáu, a vegaes incomprendíu, abegosu y costosu que namás la pasión y la constancia lleven alantre», manifestó esta asociación nes sos redes sociales pa presentar esti Premiu La Flor de Grau que, cola distinción a Mariluz Cristóbal Caunedo, abre la so primer edición.
Mariluz Cristóbal Caunedo (Tinéu, 1948) ye la gran cantadora d’asturianada. Dempués de dalgunes grabaciones nel entamu de la so carrera como campeona de concursos de tonada y de la Misa asturiana de gaita que publicó en 1998 con José Antonio García Suárez “El Gaiteru de Veriña”, asoleyó Onde la ñublina posa, un discu imprescindible na discografía moderna del xéneru. Años dempués aportó Cantar de Seronda (2005) y, en 2012, Cancios y asturianaes. La so voz suena, tamién, nos trabayos d’otros artistes y coleutivos: Muyeres, Rodrigo Cuevas, Carlos Rubiera, Hevia… Na memoria sensorial de tola xente qu’ama la tonada resuenen el raigañu del so timbre, y la so fuercia y sensibilidá inconfundibles.
Suscríbite a les nuestres novedaes
