El plenu de la Xunta Xeneral del Principáu aprobó na so sesión de güei una reforma de la Llei d’Espectáculos Públicos y Actividaes Recreatives pa dar cobertoria a les actuaciones musicales de pequeñu formatu, una iniciativa que se tramitó por llectura única respaldada por tolos grupos parllamentarios de la Cámara, sacante Vox.
La reforma va permitir que los llocales que nun cunten con llicencia específica pa espectáculos puedan acoyer actuaciones musicales tres presentar una declaración responsable y avisar al conceyu correspondiente con un mínimu de 48 hores d’antelación. Estes actividaes van poder realizase tanto n’espacios zarraos como en zones esteriores, como terraces y merenderos, siempre que se respete una distancia mínima de 40 metros respecto a zones residenciales pa garantizar la convivencia cola vecindá.
No que cinca a los horarios, les actuaciones van poder desenvolvese ente les diez de la mañana y les once de la nueche, anque esta llende nun s’aplicaría a los llocales que dispongan de sistemes d’insonorización. La reforma puede suponer un impulsu importante pa la música en directo n’Asturies, facilitando la programación cultural n’espacios pequeños y de cercanía, como se facía antaño. Dende Unidos por la Cultura en Asturias, plataforma en defensa de la música en vivo, aplauden la iniciativa d’una reivindicación pola que lleven bregando dende’l so nacimientu.
Suscríbite a les nuestres novedaes
