Ana Pereda -voz y charango-, Anaïs Vanmalle -saxu y voz-, Cyril Bouas – trombón y voz-, Emiliano Germain -batería y voz-, Abraham Portilla -guitarra- y Cesar Nicolaieff -contrabaxu y voz- son laGuinda, un proyectu musical asitiáu en Francia y que bebe de la señaldá y la emigración d’una de les sos componentes, la música asturiana Ana Pereda -Filanda-. Esta selamana asoleyaron un nuevu single y videoclip, ‘Pandeiru‘, un cantar folixeru inspiráu nun cantar vaqueiru.
Tres del so últimu llanzamientu, ‘Morenina‘ -que celebra’l resurdir del baille tradicional y el ritu de la romería-, laGuinda publica agora esti tema que reinterpreta una vaqueirada del repertoriu tradicional recopiláu por Eduardo Martínez Torner nel Cancionero musical de la lírica popular asturiana (1920) y que yá versionaron Anabel Santiago y Llevólu’l Sumiciu -cola mesma interpretación d’ella-.
‘Pandeiru‘ destaca pol usu de la percusión, los vientos, la guitarra y el charango, instrumentos que s’amiesten p’algamar un calter estremáu al tradicional, una de les característiques que faen especial a la banda. Amás de la melodía y lletra tradicional, na segunda parte del single suena una composición d’Ana Pereda na que la idea de tornar ta presente, un recordatoriu de que laGuinda va sonar bien ceo n’Asturies.
Suscríbite a les nuestres novedaes
