Acaba’l cursu y delles escueles de música tradicional tán faciendo actuaciones del so alumnáu pa que pongan poner enriba l’escenariu los sos deprendizaxes. Una d’elles ye la Escuela de Música Tradicional de la Banda Gaites Villaviciosa «El Gaitero», qu’esti xueves 25 a les 19h celebra’l so conciertu fin de cursu na Plaza de La Poesía de la capital maliaya.
Nel actu van amosase les distintes modalidaes impartíes: gaita asturiana, tambor tradicional, acordión diatónicu, pandereta, baille tradicional y percusión pa banda de gaites; toes elles con un alumnáu qu’esti añu «continúa revitalizándose con alumnes y alumnos nuevos de toles edaes«, como espón esta agrupación.
Nos sos 40 años de camín, la Banda de Gaita Villaviciosa «El Gaitero» llevó’l nome de Villaviciosa per una montonera llugares de tol mundu, siendo al empar organizadora d’importantes eventos culturales na capital maliaya. Con esti conciertu fin de cursu quieren amosar que «la música tradicional sigue viva y con tirón nel conceyu», sicasí tamién animen a que «más xente s’apunte» a la so Escuela de Música Tradicional, «porque ensin la escuela nun esistiría la banda de gaites». Mentanto, esti xueves van facer una amuesa de la so bona salú.
Suscríbite a les nuestres novedaes
