L’Archivu de la Música Contemporánea Asturiana (AMCA) ta acabante d’actualizar la so Sonoteca cola información de los llanzamientos que s’asoleyaron en 2024. Asina zarra la so entrega anual esti archivu que «quier ser una ferramienta amañosa pa toes aquelles persones interesaes (aficionaos, estudiosos, investigadores o intérpretes) na música asturiana contemporánea» y que, d’esta manera, sigue otru añu más poniendo a disposición del públicu materiales inéditos y otros poco conocíos, amás de dixitalizar otros pa que puean llegar a tol mundu a traviés d’Internet.
Ente los materiales espardíos pol AMCA nesti tiempu alcuéntrense grabaciones, cartafueyos, revistes, pieces audiovisuales, semeyes… y too ello ta organizáu en tres estayes: la Sonoteca -na que se lleva un rexistru de los llanzamientos discográficos asoleyaos nos caberos años- , la Hemeroteca -onde se dixitalicen publicaciones impreses dedicaes a la música’l país-, y Inéditos, nel que poder consultar materiales «que quedaron amatagaos, tapecíos o escaecíos».
L’AMCA ye un proyectu que surde de la collaboración ente Goxe Producciones y Musicasturiana.com, ta dirixíu por Xune Elipe y cunta col sofitu de la Conseyería de Cultura, Política Llingüística y Deporte. Dende mediaos de 2021 yá asoleyó más de 30 conteníos d’interés pa tola xente interesáu nos aspectos más contemporaneos del patrimoniu musical asturianu.
Suscríbite a les nuestres novedaes
