El 11 d’avientu de 2023 Xicu Ariza, responsable de musicasturiana.com, presentó na Xunta Xeneral, l’informe La Necesidad de Apostar por el Desarrollo de las Industrias Culturales y Creativas Asturianas, un documentu que repasa dalgunes cuestiones de la política cultural asturiana. Nesa comparecencia participaron doce persones distintes vinculaes a les ICC asturianes y de les sos intervenciones salió una crítica prácticamente unánime a l’ausencia d’unes polítiques culturales actualizaes. Pesie a dalgunos avances, entá queda camín por facer y, coincidiendo col final del procesu de presentar l’informe a los partíos políticos, asoléyase l’anexu Propuestas políticas de urgencia para la cultura asturiana.
Durante los meses d’avientu y xineru, Ariza presentó l’informe a diputaos y diputaes de los partíos políticos con representación na Xunta Xeneral qu’amosaron sensibilidá con esta cuestión: Covadonga Tomé del Grupu Mistu; Jose Luis Costillas del PP; Xabel Vegas y Delia Campomanes d’IU-Convocatoria por Asturies; y Adrián Pumares de Foro Asturias. Tres solicitar reunión col presidente asturianu, Adrián Barbón, col conseyeru de Ciencia, Empreses, Formación y Empléu, Borja Sánchez, y cola Conseyera de Cultura, Política Llingüística y Deporte, Vanesa Gutiérrez; esta prodúxose finalmente’l pasáu 20 de mayu cola responsable de Cultura.
A Gutiérrez presentóse-y l’anexu ellaboráu a costafecha pa esta reunión. N’él compleméntase lo yá recoyío nes páxines 45, 49 y 50 del informe orixinal; y priorícense
dalgunes de les decisiones polítiques que podríen tomase pa potenciar el crecimientu y profesionalización d’un sector que pue ser una oportunidá pal desarrollu económicu, social y cultural d’Asturies. Nesti sen, recueye una quincena de propuestes básiques estructuraes en cuatro bloques: Marca, estratexa dixital y portal únicu de les ICC; Meses sectoriales, conseyu de la cultura asturiana y plan estratéxicu de la cultura asturiana; Creación de públicos y de creadores; y Una alministracion al serviciu de les ICC y de los sos creadores.
Comparatives y exemplos
L’anexu tamién establez exemplos y comparatives tanto d’otres estayes del propiu gobiernu asturianu que tienen un funcionamientu más adecuáu a les necesidaes del so sector, como con dalgunes iniciatives desendolcaes por otres Comunidaes Autónomes. Tres de presentalo a Vanessa Gutiérrez nuna reunión con bon ambiente de diálogu -y na qu’esta informó de dalgunos de los próximos avances de la Conseyería que xestiona-, va a presentase a los diputaos y diputaes colos que yá hubo reuniones.
Suscríbite a les nuestres novedaes
