Siguen les presentaciones de Diarios d’una panderetera, el primer llibru de Leticia Baselgas. La siguiente cita va ser esti sábadu 15 de febreru a les siete la tarde nel Conceyu Cultural la Rexa, ún de los espacios referenciales pa la dinamización de la cultura’l país na fastera del Cabu Peñes. Xunto a ella va tar Alicia Álvarez, editora del llibru con La Fabriquina, sellu del que ye codirectora.
En Diarios d’una panderetera la componente de L-R, cantante, panderetera, artista visual y doctora n’Arte na Universidá d’Uviéu, Leticia González Menéndez Baselgas, percuerre a lo llargo 150 páxines conceptos como la tradición, la identidá y l’autenticidá, dando forma a una obra d’interés pa quien busque afondar nos símbolos que construyen la idea d’Asturies y pa cualquier persona interesada nos procesos de recuperación y reproducción de la tradición.
Con ritmu cinematográficu y la guía d’una documentada brúxula teórica, Baselgas rellata les sos primeres esperiencies nun grupu de baille marcaes pola disciplina y l’imaxinariu folclóricu posfranquista; el so posterior desencantu cola música tradicional y el rigorismu etnográficu; y, pa remtar, la so llegada al conceptu de post-folk-asturianu como un espaciu de llibertá creativa. Asina ye que la cultura de raigañu ta bien presente nesta obra; la so autora lleva reflexonando alrodiu d’ello de magar yera una neña y , agora, aborda en forma d’ensayu nestos diarios personales escritos per más de dos décades.
Manifiestu
Cola publicación d’esti llibru de Leticia Baselgas, La Fabriquina estrena la colección d’ensayu «Manifiestu«, cola busca recoyer l’actual pensamientu asturianu nun formatu breve y accesible. Xunto a otros trabayos yá publicaos por esta editorial como Nunca Vencida o Asturianes, medra la lliteratura rellacionada cola identidá, historia y cultura del país.
Suscríbite a les nuestres novedaes
