El conxuntu de música antigua Forma Antiqva -proyeutu de los hermanos Aarón, Daniel y Pablo Zapico-, presenta’l xueves 20 a les 18h el so nuevu discu De sópitu na Sala de Cámara del Auditoriu d’Uviéu. L’álbum, que yá sonó en delles sales como programa de conciertu, ye ún de los trabayos con más vinculación personal pa la formación, una esploración de les conexones ente la música de raigañu y la clásica na que la música popular asturiana convive con obres de compositores como Händel, Matteis o Sanz.
De sópitu ye’l primer trabayu que llancen col so sellu propiu, resultáu del llabor en comuña con otros profesionales asturianos ente los que tán Ricardo Villoria, Fernando Arias, Ismael González y Xurde Álvarez. Cantares populares como ‘El señor cura de la Piñera’, ‘Nun llores nin’ o ‘Santa Bárbara bendita’ suenen nel repertoriu d’esti nuevu proyectu de los hermanos Zapico xunto con otres melodíes del Arcu Atlánticu. «El Barroco, la nuestra época d’especialización, ye una época qu’afonda na música popular. Lo que tentamos facer con De sópitu ye poner en primer planu esa música de raigañu popular y establecer conexones. Garrar una xota de tradición oral d’un pueblu d’Asturies y amestala con una Jota de Santiago de Murcia, o garrar la ‘Sinfonía de los Pastores’ de Händel y ponela en contestu con música tradicional del Arcu Atlánticu», desplica Aarón Zapico.
Forma Antiqva nació en Llangréu va más de dos décades y ye una de les formaciones más influyentes y reconocíes de música clásica nel Estáu español. Mesmo en tríu -colos hermanos Zapico como solistes- que como orquesta barroca, aborden el repertoriu instrumental y vocal de los sieglos XVII y XVIII. Siempre cerca de l’actividá creativa que-yos arrodia, participen davezu en proyectos multidisciplinares y, amás, amuesen el so compromisu pa cola docencia, la divulgación y la evolución del sector de la industria musical.
Suscríbite a les nuestres novedaes
