La conferencia SAnTINA 2023 abre’l plazu pa recibir contribuciones d’estudios rellacionaos cola cultura asturiana

La Sociedá pal Análisis de Temes culturales ya Identidaes llingüístiques N’Asturies (SAnTINA) fai un llamamientu pa toles persones interesaes en participar na so conferencia d’esti añu. N’ella tienen cabida tolos estudios rellacionaos cola cultura asturiana, incluyíos los que se centren na música o tán rellacionaos con ella. Esta ye la información pa los interesaos, xunto al cartelu d’esti añu:

Llamamientu a contribuciones
Conferencia SAnTINA, 2023

Sociedá pal Análisis de Temes culturales ya Identidaes llingüístiques N’Asturies

Modalidá telemática · 3 y 4 de mayu de 2023
Fecha límite d’unviu de propuestes: 15 de xineru de 2023

 
Convidamos al unviu de contribuciones rellacionaes col campu de los Estudios Asturianos, concebíu de manera amplia, como l’análisis de la llingua, la cultura y la hestoria d’Asturies y de los/es asturianos/es dende la perspectiva de les ciencies sociales y humanidaes. Les posibles exes temátiques inclúin la llingua, la llingüística, la lliteratura, el cine, la música, les artes visuales, la hestoria, l’activismu, la migración, los deportes, la industria, la salú y el mediu ambiente n’Asturies. 
 
Esta segunda conferencia SAnTINA va tar entamada pola Oklahoma State University y coordinada pola profesora Isabel Álvarez Sancho, profesora titular de la Oklahoma State University y vicepresidenta de la iniciativa académica Asturian Studies. Va tener llugar de manera virtual dafechu los díes 3 y 4 de mayu de 2023. La inscripción ye de baldre mesmo pa los/es ponentes que pa los/es asistentes. La conferencia SAnTINA 2023 coordínase en collaboración col grupu de trabayu Asturian Studies . La so presidenta, la profesora Covadonga Lamar Prieto, y la vocal Miriam Villazón Valbuena, dambes de la Universidá de California-Riverside, entamaron la primer Conferencia SAnTINA en 2021. Asturian Studies/SAnTINA ye una iniciativa académica dedicada a siguir desenvolviendo’l campu de los estudios asturianos y a esparder la cultura asturiana internacionalmente.

 Guía pal unviu de propuestes:

• Los resúmenes y la información de los/es participantes tienen de ser unviaos a traviés d’esti formulariu a más tardar el 15 de xineru de 2023:

https://docs.google.com/forms/d/e/1FAIpQLSe1ypsNN6n2A7-SlG_la-ZjN3l6A7xh_WYsUs3lOv1rapHvQg/viewform 

• Los/es participantes van poder proponer un máximu de dos resúmenes, unu individual y unu conxuntu. 
• Les contribuciones tienen de tar escrites n’asturianu, castellanu o inglés, o una combinación d’estes llingües.
• Les notificaciones d’aceptación van ser unviaes a partir del 31 de xineru de 2023.

Contactu:

• La dirección de contactu pa cualesquier entruga ye: santinaconfe@gmail.com
• Páxina web: https://santinaconference.wordpress.com/   
• Boletín d’Asturian Studies: https://asturianstudies.substack.com/p/asturian-studies-newsletter-fall