Ayeri falleció n’Uviéu con 99 años María Josefa Fernández, o como se la conocía, Pepa Las Murias, una de les referencies más importantes pa la tradición oral n’Asturies. Con ella inauguróse’l programa de TPA Camín de Cantares y tamién ilustró’l primer discu de Tuenda, nel qu’apaecía Pepa na so cocina xunto a Xosé Ambás, Elías García y Pepín de Muñalén. Pero yá dende los años 90, Pepa yera una informante de cabecera pa tolos investigadores que trabayaben sobre la cultura tradicional. D’ella destacaben, amás del so bagaxe de tradición, que yera una persona con una mentalidá abierta y una simpatía que llegaba tanto a los que la sintieron de primer mano como a quien la vio na televisión.
La voz de Pepa tamién quedó rexistrada nos Atlas Sonoros de la Llingua Asturiana y nel Archivu de Tradición oral d’Ambás, porque falaba un asturianu occidental de Grau mui llamativu, guapu de sentir, col que dende Ca Trillivalle, en Las Murias, cuntaba cuentos como’l d’El Bautizu del carneiru, Las bodas del cielu o el del diablu qu’ayudaba al probe.
Pepa falleció ayeri en Uviéu, con 99 años. La capilla ardiente ta instalada nel Tanatoriu de Grau, y el funeral va ser güei, martes 20 d’avientu a les 16.00 na ilesia parroquial de Cuaya, en Grau. Los sos cuentos, la so hestoria, la so fala y los sos cantares son la inmensa herencia que «la güela d’Asturies» (asina se refier a ella Ambás) dexó y caltendrán la so memoria cada vez que daquién los recite o los cante otra vegada.
Suscríbite a les nuestres novedaes
