Esti 6 y 7 de mayu celébrase la cuarta edición del Congresu Internacional SAnTINA, eventu académicu dedicáu a los estudios asturianos que ta promovíu pola Oklahoma State University, University of California-Riverside, Universitatea Ștefan cel Mare de Suceava, la Sociedá pal Análisis de Temes Culturales y Identidaes Llingüístiques n’Asturies (SAnTINA) y la Universidade de Vigo. Esta última universidá va acoyer les ponencies presenciales, que tamién van poder siguise de forma virtual. La llingua y la cultura asturiana son les protagonistes de les distintes ponencies, nes que tamién hai espaciu pa la música.
Tendiendo puentes entre la academia y las músicas populares urbanas: simbiosis e hibridación en la obra de Marisa Valle Roso ye una de les comunicaciones rellacionaes cola música’l país. Va ponela Elba Rodal Graña, del Conservatoriu Superior de Música del Principáu d’Asturies, el xueves 7 de 16.30h a 16.45h. Tamién el miércoles 6, de 17h a 17.15h hai otra ponencia rellacionada cola música tradicional, ye la de ‘Me pusi la permanente, creyendo que era más guapa’: coplas tradicionales y modas en el peinar, de Luis González Fernández (École des Hautes Études Hispaniques et Ibériques – Casa de Velázquez).
Amás d’estes, va haber otres más de venti ponencies que xiren al rodiu la llingua, lliteratura y llingüística asturiana; historia, activismu, migraciones; industria, salú y ecoloxía, ente otres cuestiones dientro d’un congresu va incluyir secciones temátiques; conferencia plenaria; presentaciones de llibros y proyectos d’investigación; les meses redondes Linguistics 4.0: How AI is transforming the study of language; Humanidades médicas y lenguas minorizadas; Amigos/as de los estudios asturianos; y el premiu Ana Cano.
La Sociedá pal Análisis de Temes Culturales y Identidaes Llingüístiques n’Asturies ye una rede d’académicos y creadores culturales con sede n’Estaos Xuníos que se llanzó en 2021 cola I Converencia SAnTINA p’aumentar la visibilidá internacional de los Estudios Asturianos, promoviendo al empar el desarrollu de proyectos collaborativos. Ente los sos oxetivos tán los de «fomentar un espaciu pa la investigación, enseñanza y difusión de la llingua y cultura asturianes a nivel internacional, amás de factiliar el diálogu ente asturianos y académicos asturianos, tanto n’Asturies como na diáspora».
Suscríbite a les nuestres novedaes
