El programa de la Selmana de les Lletres Asturianes inclúi tres actuaciones musicales

El Gobiernu d’Asturies impulsa una nueva edición de la Selmana de les Lletres Asturianes con una programación descentralizada que va llegar a 14 conceyos y que combina’l rescate d’una figura esencial na lliteratura asturiana, la de Taresa Cónsul, col teatru popular, la creación contemporánea, la memoria cultural y la participación ciudadana.

La XLVII Selmana de les Lletres Asturianes espliega un programa diversu que consolida la presencia del asturianu y del eonaviegu na vida pública y cultural. La celebración empieza güei, día 30 d’abril, col Conciertu de les Lletres Asturianes, de la Orquesta Sinfónica del Principáu (OSPA), y va desenvolvese hasta’l 10 de mayu, con más d’una ventena d’actividaes destinaes a averar la llingua asturiana a nuevos públicos y reforzar el so usu en distintos ámbitos. Nestes actividaes, amás del propiu conciertu de la OSPA, hai otres dos actuaciones musicales:

• El miércoles 6 de mayu a les 20:30 hores, na Ilesia de La Llaboral de Xixón, va producise Duces suaños: un musical pal sieglu XXI, cola dramaturxa y dirección de Laura Iglesia. Va cuntar coles actuaciones de la rapsoda Cris Puertas y el Coru de les Novicies de la Orde de Cuarta Pregunta, que va dirixir Mapi Quintana.
• El domingu 10 de mayu a les 13:00 hores, n’El Parche d’Avilés, va asoceder el flashmob A toos nos… IN-THERESA, dirixíu por Dolfo Camilo Díaz, al cargu de La Caracola, Pandereteres de Corvera y Avilés y Asociación Cultural Caparines, y cola actuación de los rapsodes María López Barrio y Antón Caamaño.

Xunto a estes actuaciones con presencia de la música asturiana hai una montonera d’actividaes d’esta Selmana coordinada por Dolfo Camilo Díaz y Laura Iglesia. Puedes consultar tola programación equí: