«Llevamos tiempu trabayando nuna versión única de “Coral y Maera”, preparada especialmente pa esta gala»

Esti sábadu 22 d’ochobre a les 22h tien llugar nel Teatru La Llaboral de Xixón la gala final del XIV Premiu Camaretá al Meyor Cantar, l’únicu premiu institucional qu’existe anguaño pa da-y reconocimientu a la música fecha n’asturianu o gallego-asturianu. Algaire con “Coral y Maera”, Dixebra con “Como’l Mar” y Mostru l’Horru con “Fíu d’un Pueblu”, son los tres grupos y cantares nominaos nesta edición. Dende musicasturiana.com vamos falar esta selmana cada día con ún de los artistes nominaos pa conocer por qué escoyeron esi tema, si tienen preparao daqué especial pa la final y qué supón participar nesti certame.

Entamamos el cuestionariu con Algaire, banda formada poles pandereteres y cantantes Loreto Suárez, Iratxe Espina, Carla Miranda y el guitarrista Juan Yagüe. ‘Coral y Maera’ ye’l so primer discu, nel que faen música tradicional fusionada con estilos contemporáneos como’l pop, rock, electrónica o la música llatina, p’asina averar los sones de raigañu a nuevos públicos.

¿Qué supón pa vosotres la nominación nesti premiu y qué supondría ganalu?

El simple fechu de tar nominaos fáinos una ilusión tremenda; pa nós yá ye un premiu y un reconocimientu al nuestru trabayu. El Camaretá ye ún de los premios más importantes y prestixosos no que se refier a la música en llingua asturiana y gallego-asturianu, y optar a un gallardón al que tamién tuvieron nominaos n’otres ediciones grupos que son referentes pa nós como Corquiéu, Tejedor, Blima, Dixebra, Alfredo González, etc… tiénnos tremendamente felices.

Ganar el premiu supondría p’Algaire un chute d’enerxía brutal pa siguir trabayando en nuevos proyectos, una recompensa al trabayu y esfuerzu que supunxo sacar alantre el discu y, ensin dulda, sería una ferramienta de promoción brutal pal grupu nel futuru.

¿Por qué escoyistis esti cantar pa concursar?

“Coral y Maera” ye un cantar que tien un significao mui especial p’Algaire dende qu’entamamos a trabayalu. Tanto que, de fecho, sirvió pa da-y nombe al primer discu del grupu. Paecíanos un tema con una serie de cualidaes que lu facíen encaxar bien dentro de la filosofía del Premiu Camaretá al Meyor Cantar y decidimos apostar por él.

¿Tenéis daqué especial preparao pa l’actuación del sábadu?

Si. Nun queremos desvelar mucho, p’animar a que la xente que tea interesada a que vaya al Teatru de La Laboral esti sábadu a descubrilo en primicia, pero sí podemos adelantar que llevamos tiempu trabayando nuna versión única de “Coral y Maera”, preparada especialmente pa esta gala, y qu’enriba l’escenariu vamos tar mui bien acompañaes por collaboradores habituales y non tan habituales del grupu. Esperámosvos a toos y a toes el sábadu nel Teatru de La Laboral pa enseñávoslo.

Sienti “Coral y Maera” d’Algaire y merca’l discu