Los Berrones anuncien «una xira diferente y especial» pol so 35 aniversariu

Los Berrones anunciaron güei na sede de la SGAE d’Uviéu la que va ser la xira del 35 aniversariu del grupu de Tolivia y que va arrancar el prósimu 8 de xineru nel Centru Niemeyer d’Avilés; una xira na que prometen que se verá daqué «diferente y especial». Esti primer conciertu cunta cola collaboración de la Banda de Música de Pravia, dalgo que los llavianeses probaren va trés meses en Pravia y onde los temes van tener dellos arreglos.

El grupu, creador del agro-rock, caltién nesta xira, onde van sentise temes del últimu discu y los sos grandes ésitos, la esencia que-yos define dende que xubieren per primer vez a los escenarios n’El Meruxal, nel añu 1987. Dende esi mesmu añu, nun diben baxar de les tables hasta 2020 col postrer conciertu nel Marcianito Fest, onde l’andanciu impidió que siguieren amosando los sos cantares en direutu. Agora, tres la cancelación de la xira por mor del COVID-19, arranquen con una montonera de conciertos a lo llargo del Estáu español.

Hasta’l momentu, amás del conciertu d’aniciu de xira n’Avilés, van tocar na Sala Capitol de Santiago de Compostela, nel Escenariu Santander y en La Riviera, en Madrid. N’ellos, van tar acompañaos d’otros artistes del panorama estatal, cola intención de rematar la vuelta a los escenarios con un conciertu n’Asturies acompañaos de dellos artistes asturianos. «La xira que queremos empezar a facer ye pa dexar atrás esa sordidez que nos llevó a la sociedá entera a tar encerraos y agora por fin vamos salir, con una xira un poco más especial», comentó Ramón Blanco, vocalista y guitarrista de Los Berrones. 

Reivindicación de la oficialidá
Amás, aprovecharon la rueda de prensa pa, énte la reforma del estatutu, reivindicar la oficialidá de les llingües propies d’Asturies. Opten por iniciatives nes que se fomente falar n’asturianu y que nun se dexe morrer. «Cantamos n’asturianu porque ye la nuestra llingua materna, nun ye dalgo que se planteara cuando entamamos col grupu. Falamos asturianu con absoluta normalidá y la oficialidá sedría lo más normal del mundu», argumentaba’l baxista, Olegario Méndez.

Les entraes pal conciertu nel Centru Niemeyer del 8 de xineru yá tan a la venta na páxina web de Los Berrones, onde tamién se van dir anunciando les prósimes feches del grupu.

Mercar discos de Los Berrones na tienda online

Dexa un comentariu

X