Fin de selmana enllenu de música asturiana con ocho conciertos y espectáculos
Esti puente festivu va tar enllenu de música’l país, con 5 conciertos y 3 espectáculos de dellos estilos que van facese pel centru y oriente d’Asturies. La programación arranca esti vienres 3, a les 19.00h na Sala Loreto de Colunga, con “Fierro, carbón y metralla”, l’espectáculu nel que’l músicu David Varela y l’escritor Francisco Álvarez axunten música y lliteratura. En Xixón, dientro de los Alcuentros de Músiques Asturies va actuar a les 19.30h el grupu de pandereteres feministes Nun Tamos Toes nel CMI d’El Coto.
El sábadu 4 l’actividá arranca a les 13.30h na Fiesta los Pimientos Rellenos de Blimea cola actuación d’Ún de Grao, intérprete de tonada renovada. El grupu de jazz de raigañu Slum Suit va estrenar el so espectáculu “Siguiendo’l Camín d’Iturralde” nel Casinu de Llanes a les 19h, mientres qu’otru espectáculu, el de “Tradicionando“, qu’axunta música, baille y cantares tradicionales, va representase nel Teatru Vital Aza de L.lena a les 19h, El gaiteru Celso Díaz cola so banda va actuar a les 20h nel Auditoriu José Barrera de Pravia y Skama la Rede vuelven a dar un conciertu de llarga duración, na sala Gong d’Uviéu a les 21.30h.
Los conciertos rematen el domingu cola actuación del dúu post-folk L-R, en La Buena Vida de Xixón. Toles actuaciones son de baldre, sacantes la de Skama la Rede que tien un preciu d’entrada de 8 € anticipada y 11 € na puerta, y la de L-R, que cuesta 5 €.
Cultura en Rede
La metá d’estes actuaciones formen parte de “Asturies Cultura en Rede“, el programa del Gobiernu del Principáu d’Asturies pa poner en marcha un cultural pelos distintos conceyos del país. La música y la cultura tradicional formen parte de la programación, amás de les artes escéniques, la lliteratura, el cine, les artes visuales y delles actividaes especiales coincidiendo col Xacobéu.
