«Vamos tocar too temes pa baillar y queremos da-y la mesma importancia a los bailladores que a los músicos»
“Monteavaro, Muñalén & Amigos. 15 años tocando xuntos“, baxo esi nome estrénase un nuevu espectáculu de música asturiana esti domingu 5 d’avientu, a les 13.40h, na Foliada d’A Fonsagrada (Lugo). Dos renomaos músicos de la música tradicional del país, Miguel Monteavaro (Caldo y Os Rabizos, Mezá) y Pepín de Muñalén (Tuenda, La Bandina’l Tombo, Caldo y Os Rabizos…), xúntense pa dar forma a un conciertu mui especial, enllenu de collaboraciones de músicos y con protagonismu del baille.
«Vamos tocar too temes pa baillar; un repertoriu propiu como músicos tradicionales, con pieces que van dende la zona de Pepín hasta la mio zona. Tanto temes que yá tocamos con Caldo y Os Rabizos como munchos más del nuestru archivu», comenta Monteavaro sobre la música que va sonar nesti conciertu. Sicasí, esto último namás ye una parte del espectáculu porque, como afirma el músicu de Bual «queremos da-y la mesma importancia a los bailladores que a los músicos, porque munches veces los músicos pensamos qu’enriba del escenariu somos lo que facemos too y lo demás xente que se xunta, pero la música tradicional del baille nun se pue entender ensin el baille».
Pa desendolcar too esto, van acompañar al baille los gallegos Artur Pugar y Rebeca Callón y una representación del grupu Xeitu d’Asturies. Nes collaboraciones musicales van tar tol conciertu Josiño Rodríguez al bombu y Daniel Carballo a la caxa; amás de Roi Sampedro a la guitarra, Manu Lucas a la guitarra caipira, Cibrán Seixo al violín -al que Monteavaro considera «ún de los músicos tradicionales más potentes de Galicia», y Davide Salgado, «cantante, performer y mui famosu», añade’l músicu de Bual que, pela so parte, va tocar la gaita y Muñalén el saxu.
Más conciertos n’Asturies
«A ver cómo funciona lo d’A Fonsagrada y, si sal bien depués, moveríemos el conciertu per Asturies con otros collaboradores; por exemplu, si lo facemos pel centru d’Asturies, cuntaremos con colegues nuestros del centru d’Asturies» , comenta Miguel Monteavaro sobre la posibilidá de dar más conciertos nesti formatu especial. Amás, añade col que van cuntar siempre pa próximos espectáculos va ser col so hermanu y compañeru, Andrés Montevaro, «que nun pue tar na celebración del domingu porque ta agora mesmo trabayando en Francia, pero la celebración tendría que ser ente los tres».
