El grupu de violonchelos del Conservatoriu del Nalón y la compañía Con Alevosía Teatro únense pa interpretar un orixinal espectáculu nos centros escolares del Valle del Nalón. Trátase d’una serie de conciertos didácticos nos que s’interpreten cantares asturianos -sobre manera rellacionaos col trabayu y los mazcaritos- y se desplica d’una forma teatralizada les costumes qu’acompañen a esos cantares. Too ello cola participación activa de la reciella, que tamién va preparar cuartetes d’aguilandos, facer percusión corporal y armar una danza.
El proyectu ta coordináu por Jesús Helguera (profesor de violonchelu del Conservatoriu Valle del Nalón), sobre una idea orixinal de Carla Miranda (Algaire, Tierra y Eco) y tien arreglos musicales de Javier Blanco. Los números musicales desendólcalos el grupu de violonchelos y solistes del Conservatoriu Valle del Nalón, qu’interpreten cantares de trabayu, aguilandos y un saltón.
Acullá de la música, Con Alevosía Teatro presenten la historia d’una moza y so tía-güela, que guarda munches semeyes y ayalgues de cuando yera moza. D’esta manera representen la modernidá y la tradición nesta actividá que va facese nos colexos de Llangréu, Samartín del Rei Aurelio y Llaviana. El miércoles 13 va ser la primer cita nel Colexu Nuestra Señora.del Rosario, en Sama.
Suscríbite a les nuestres novedaes
