Los premios AMAS llancen la playlist colos cantares nominaos de 2022

Per cuartu añu consecutivu, Musicasturiana.com collabora colos Premios AMAS pa facer la playlist oficial del eventu. Nella suenen los cantares nominaos -que tean xubíos a Spotify- nes estayes de canción y discu Folk, Rock, Otras Escenas, Música Urbana y Grupo Revelación. El próximu 13 de febreru remata’l plazu pa votar nel que del total de ventiún categoríes hai once con presencia d’artistes rellacionaos cola música n’asturianu y/o de raigañu. Amás, de les 84 nominaciones totales, ventidós son p’artistes que participen d’escena.

Como cada añu, les estayes nes que más nominaciones hai pa la música d’espresión asturiana son les venceyaes a la música folk. Nesti sen, esti añu tán nominaos a Mejor Disco Folk los grupos L-R con ‘N.O.S.’, la Orquesta Céltica Asturiana con ‘Músicas del Arco Atlántico‘ -anque nesti discu nun hai nengún cantar de raigañu asturianu-, Luis Núñez y Los Folganzanes con ‘Xanzaina‘ y Baxel con ‘El Cantar del Simpatías’. Na estaya de Mejor Canción Folk los escoyíos pol xuráu son la Banda Gaites Camín de Fierro con “Flacos y Ensin Peinar“, Abéu con “Dame Tira“, Llevólu’l Sumiciu con “L.lamentu” y Fernando Valle Roso y Silvia Moreno con “Tengo un Vieyu en Casa“. Na estaya de Gaita, tán les bandes de gaites de Ribeseya, Xácara (Uviéu), El Trasno (Cuaña) y Güestia (L.lena).

En cuantes a instrumentistes, tán nominaos Susana Gudin de Taranus na categoría de Voz; Eva Díaz Toca y Xaime Arias (de Slum Suit y otros proyectos de jazz de raigañu) nes estayes de Batería y Teclaos; y los lletristes Ruma Barbero de Felpeyu y otres bandes, amás d’Alicia Álvarez y Toli Morilla qu’amesten lletres n’asturianu con otres en castellanu.

Nueves estayes

La llista complétase con dalgunes categoríes nes que nun suel haber presencia de la música na llingua autóctona o de raigañu. Ente les candidatures de Canción de Música Urbana tán nominaos A Fesoria & Imanol Núñez con “Soi de Mieres“; Calea ye ún de candidatos a Artista Revelación; en Músicas de Cine foi escoyida la BSO de Fruela 757 pal curtiu-documental de Puru Remangu ‘Emburriando‘; mentes que’l videoclip de Bango “Raíces” fechu por Néstor Fernández ye parte de les nominaciones a Videoclip. Les votaciones puen facese na web de los Premios AMAS hasta’l 13 de febreru.

Sienti la playlist Premios AMAS 2022

Mercar discos d’artistes nominaos a los premios AMAS 2022