«Nel discu van sentise arreglos que miren pa la electrónica, pop, música llatina y urbana»

El 5 de marzu va asoleyar en CD y en toles plataformes dixitales ‘Coral y Maera‘, el primer discu del cuartetu folk Algaire. Esi mesmu día van presentalu en directo nel Auditoriu Teodoro Cuesta de Mieres, a les 20h y con entrada de baldre. Loreto Suárez, cantante y panderetera nesti grupu xunto a Iratxe Espina, Carla Miranda y el guitarrista Juan Yagüe; comenta que l’album yá ta amestándose nel estudiu de grabación y desvela dellos de los detalles d’un trabayu que define como «mui ricu y variáu».

«Partiendo de y calteniendo como base la música tradicional asturiana, quixímos buscar sonoridaes actuales y amiestos colos que poder llegar a un públicu que nun seya cercanu a esta», desplica Suárez sobre’l soníu d’esti discu nel qu’asegura que va poder sentise «arreglos que miren pa la música electrónica, pop, llatina y hasta la música urbana».

Pa da-y más forma a too, van tar acompañaes de xente veterano de la escena musical del país. Asina ye como José Manuel Tejedor pon whistles, David Varela el curdión, Juanjo Díaz les percusiones y bateríes, Fruela 757 les programaciones electróniques, Richard García los sintetizadores y J.C Vega “Cabín” el baxu. Amás, la cantante y panderetera añade que queden «más sorpreses» que van dir desvelando los próximos díes al traviés de les sos redes sociales.

Escritores mierenses y variedá llingüística

«Les lletres d’autor son, por pura casualidá, toes d’escritores mierenses», diz Loreto Suárez en rellación al apartáu lliterariu. Nesti sen, Laura Marcos escribió “Rondó FEM”, un cantar «que denuncia les violencies machistes que lleven sufriendo les muyeres dende va décades» y Luis Ángel Fernández Santos firma “Coral y Maera”, «una xota que-y da nome al discu». Nes lletres tradicionales dafechu tuvieron ayudaes por Ramsés Ilesies pa «caltener la variedá llingüística de la zona de procedencia de cada cantar», anque Suárez matiza que nelles dexaron «dalgún chisgu o llicencia pa da-y un toque más Algaire».

En poco más d’un mes va vese’l resultáu de tolo que lleva preparando dende va tiempu esti cuartetu mierense formáu en 2020 por persones venceyaes a la música de raigañu dende bien moces. Como comenta Suárez, la intención del grupu ye da-y «un calter modernu y actual a los arreglos de los temes pa qu’esta diversidá sonora avere la música tradicional a un públicu más ampliu». El conciertu del 5 de marzu ye’l «pistoletazu de salida d’esta nueva etapa del grupu» y, anque tovía nun quier desvelar toles sorpreses, la de Mieres avanza que tán preparando «una puesta n’escena especial» y que van «tratar de curiar tolos detalles pa faer qu’esi día quede grabáu na memoria del grupu y na de quien vaya a velo».

Mercar discos folk na tienda online