Vérsica ye un proyectu musical encabezáu polos componentes de Cerezal Gonzalo Pumares y Marcos Álvarez. La iniciativa axunta lliteratura -la obra ta basada nun cuentu infantil-; música folk, rock y pop; y diseñu artísticu; y el sábadu 8 de marzu va ser l’estrenu de la so puesta n’escena. Doce músicos y músiquen van xubir al escenariu del CPI de Llugones, a les 20h y con entrada llibre, pa defender un trabayu pioneru na cultura asturiana. Falamos con Pumares, vigulinista del proyectu, p’afondar nel discu y nel conciertu.
¿Cuándo, cómo y por qué naz Vérsica?
Vérsica naz nel 2024 col enfotu de dar un llugar de relevancia a la lliteratura asturiana dende la música. Tamos convencíos de qu’hai muncha música y muncha calidá na lliteratura asturiana, y a vegaes nun esisten los canales de difusión suficientes.
La idega surde del feedback que, munches vegaes, mos daba la xente cuando, d’una mena puntual n’otros proyeutos nos que venimos trabayando, facíamos un cantar a partir d’un poema. Tan bona yera l’acoyida que pensamos qu’había que plantegalo d’otra mena.
«Tamos convencíos de qu’hai muncha música y muncha calidá na lliteratura asturiana, y a vegaes nun esisten los canales de difusión suficientes»
El proyectu tuvo cocináu “en secretu”, ensin facer ruíu previu. Sacastis l’álbum y presentastis públicamente Vérsica prácticamente a la par. ¿Por qué lo ficistis asina? Normalmente vemos que’l percorríu de los grupos suel ser el contrariu.
Enantes de llanzar el proyectu a la cai, quiximos facer un trabayu fondu alrodiu’l soníu que tenía que tener. Asina, entamamos a grabar dalgunes idegues y, ensin decatanos, vímonos cola obra nes manes.
«El discu ye un cuentu que propón una reflexón sobre’l tratamientu que damos, a vegaes, a la vieyera. Quier tresmitir respetu poles persones mayores, pol drechu a decidir cómo y ónde vivir, y tamién esi valor que tien el sitiu y l’entornu propiu»
Les lletres de Vérsica nacen d’un cuentu infantil que, amás, ta enllenu de valores. ¿Qué ye lo que tresmite y cómo acaba un cuentu convirtiéndose nun proyectu multidisciplinar?
Vérsica, el discu, ye un cuentu que propón una reflexón sobre’l tratamientu que damos, a vegaes, a la vieyera. Quier tresmitir respetu poles persones mayores, pol drechu a decidir cómo y ónde vivir, y tamién esi valor que tien el sitiu y l’entornu propiu. Anguaño, que se fala tanto de la tan necesaria Llei de Dependencia, y de la soledá non deseada, queremos tamién plantegar la posibilidá de que, en dellos casos, esa soledá pue ser deseada y feliz.
La mena na qu’eso torna nesta obra ye, pa nós, mui natural: somos músicos y tamos cómodos poniendo música a los testos. Nesi trabayu atopamos dellos testos qu’esplicaben con muncho detalle caún de los sentimientos que va teniendo’l protagonista a lo llargo’l cuentu, asina que namái tuvimos que poner orden.
Por exemplu, ‘As andolias’, de Miguel Monteavaro, esplica pa nós el momentu en que los seres queríos del protagonista dexen el pueblu pa treslladase a zones más urbanes, onde tienen empreses pa trabayar y más servicios a mano; ‘Cuando pienso tierra’ de Taresa Lorences avéranos a les alcordances qu’esos seres queríos tienen dende les sos nueves ubicaciones, y lo que lo valoren. ‘Dos a una’ fala del sofitu que-yos ofrez el protagonista animándolos a colar a la gueta de los sos suaños… Pero dempués van apaeciendo aspeutos menos deseables pol protagonista, como’l conflictu interior qu’espón Vanessa Gutiérrez en ‘Escuéndime’, la perda y la falta de contautu en ‘SMS’ de Xabiero Cayarga, o la propia vieyera, cola xenial esplicación de la seronda que fai Fernán Coronas en ‘Deixá, deixá’. Estos sentimientos mécense, como lo faen na mente de cualquiera, con otros mui felices, d’amor a la tierra o de valor y esfrute de les coses cencielles, como pasa en ‘Colos güeyos cerraos’ de Xurde Fernández. El cuentu ciérrase con ‘Aquel vieyu del asilu’, poema de Nené Losada que mos sirve a nós pa esplicar un poco esa resignación, esa mirada atrás y esi desalcuerdu col cambiu: aquellos praos por estes sábanes limpies.
«Atopamos dellos testos qu’esplicaben con muncho detalle caún de los sentimientos que va teniendo’l protagonista a lo llargo’l cuentu, asina que namái tuvimos que poner orden»
Siguiendo cola lliteratura; esta manifestación artística ye ún de los tres pegoyos del proyectu. Les lletres tán basaes en poemes que percuerren prácticamente un sieglu de lliteratura asturiana. Camiento qu’esto nun ye casual. ¿Por qué ye asina y cuáles foron los criterios que siguistis pa escoyer a los y les autores y poemes?
En realidá, anque yá de mano quiximos qu’hubiera variedá llinguística y estilística, la esbilla de poemes ta fecha col criteriu de la temática, emplegando caún pa intentar, como comentábamos, averanos a les sensaciones del protagonista en cada momentu de la hestoria. El sieglu XX foi p’Asturies (como de xuru pa toa Europa) el del boom urbanu, industrial y económicu, y quiciabes el sieglu nel que más y más fuerte pasaron los cambios que fuercen la situación del protagonista de la nuesa hestoria, asina que foi fácil atopar material que sofitase la idega dende tolos puntos de vista que queríemos.
Sí tocamos un poco varies opciones pa dalgún momentu concretu de la hestoria, quedando cola pieza qu’aportase más riqueza y variedá al conxuntu. Creyemos que la esbilla podría tenese fecho dende dellos enfoques, y escoyimos esti, anque, por suerte, hai munches y mui bones opciones nel restu la poesía asturiana.
«El propiu papel que Miguel escoyó pa esta edición ta fecho con paya prensao, lo qu’aporta hasta’l golor a yerba a quien lu tien na mano»
El gallego-asturianu tamién tien presencia nes lletres. Siendo de les poques oportunidaes qu’hai de sentir folk-rock nesta llingua.
Ye verdá que nun hai munches propuestes, anque cada vegada van apaeciendo más. A nós paeznos una pena un poco, porque sabemos por más compañeros qu’hai muncha música per esa zona, amás de muncha y mui bona lliteratura y una riqueza cultural de muncha tradición, pero quiciabes foi un poco lo que-y pasó al vieyu del nuesu cuentu: que la xente va desplazándose a zones más céntriques y equipaes o comunicaes pa desendolcar el so trabayu, y eso fai que terminen trabayando en proyeutos con xente d’otres zones y usando más l’asturianu central o quiciabes otres llingües. Dende Vérsica reivindicamos la riqueza de la zona, de les músiques y de les pallabres, y tamién queremos servir un poco d’altavoz p’averales a otros públicos.
Los cabezaleros d’esti proyectu venís de Cerezal y nesti grupu les artes plástiques yá teníen un pesu importante. Sicasí, agora garren muncho más protagonismu y ye’l segundu pegoyu del proyectu. ¿Por qué esta apuesta y qué amosais nesti sen?
Cuando pensamos en facer un cuentu pa nenes y nenos quiximos da-y a Miguel G. Díaz esa idega de los cuentos manipulables, que se doblen y amuesen información per toles dobleces. Dempués, colos años de trabayu xuntos en Cerezal, foi cenciello desendolcar toles (munches) idegues qu’él vino aportando. Asina, hai detalles mui potentes nel diseñu, como la idega de que s’ilustra “lo que nun ta” cola casa vacía del vieyu, la cenefa que zarra’l discu que ye’l xardín de flores, o les truches nel aire (ensin riu) que se ven dientro de les páxines. El propiu papel que Miguel escoyó pa esta edición ta fecho con paya prensao, lo qu’aporta hasta’l golor a yerba a quien lu tien na mano. Agora pal directu ta preparando un montaxe increíble, con un significáu y unos efeutos ablucantes.
«Queríamos separtanos de les sonoridaes más folkies que venimos trabayando n’otros proyeutos»
En cuantes a la música, axuntais dellos estilos, anque la base sonora ye’l pop-rock. ¿Cómo presentáis la sonoridá del álbum?
Vérsica pretende tener una sonoridá propia, sele y tamién trallera. Queríamos separtanos de les sonoridaes más folkies que venimos trabayando n’otros proyeutos, anque ye una zona sonora onde tamos cómodos y a la que, creyemos, somos quien a saca-y bastante rendimientu. Sicasí, prestábanos que, ensin perder la sensibilidá nes partes que la necesitamos, hubiere un enfoque muncho más rockeru, cola pegada y contundencia qu’eso pue aportar. A la fin, tamos proponiendo un averamientu a la lliteratura que, por más que venga cola llingua asturiana como filu conductor, ta lloñe de les temátiques o les fontes del folk.
«Toles voces sofiten con coros los demás cantares del discu, lo que, nel trabayu de producción, aportó unes posibilidaes enormes pa dar a les pieces el caráuter que buscábamos»
Ente los numberosos músicos implicaos nel proyectu destaca la inclusión de cuatro voces femenines -aparte de la masculina-. Esto da-y tovía más orixinalidá a Vérsica. Si podéis afondar en quién son eses cantantes y por qué elles.
Nel discu, amás de Marcos Álvarez, trabayen cuatro cantantes que vienen d’espacios mui separtaos de la música asturiana. Ana Belén Rodríguez, que ye la voz qu’abre’l discu, tien un tonu dulce y una mena mui sensible de tresmitir. Nótase, amás, que tien bien d’esperiencia como narradora oral. Esther Yuste ye la cantante de proyeutos como The Soulers y aporta una pegada y una fuercia tremendes. Isa R. Infiesta tien esperiencia nel mundu’l jazz pero, quiciabes pola so querencia pola música tradicional, tien una versatilidá tremenda y una sensibilidá que ye clave na defensa de los sos cantares. A Andrea Álvarez conocémosla de la primer etapa de Cerezal, y paecionos una ocasión perguapa, yá que cuasi tolos cerezalos tamos nesta grabación, pa volver a esfrutar del so amplísimu rexistru.
Toles voces, amás, sofiten con coros los demás cantares del discu, lo que, nel trabayu de producción, aportó unes posibilidaes enormes pa dar a les pieces el caráuter que buscábamos.
«Queremos que los directos seyan una esperiencia igual d’especial que’l discu, polo que ye verdá qu’habrá espacios onde nun seya posible desendolcar esta propuesta»
El sábadu 8 vais estrenar too esto en directo. ¿Qué ye lo que va poder vese enriba l’escenariu? Imaxino que los tres pegoyos del proyectu tarán presentes.
Eso ye. Va haber cuentu, va haber poesía, va haber música y tralla y va haber un espectáculu visual perespecial que tamos preparando con muncho ciñu y que creyemos que quedar pa l’acordanza. Vamos ser 12 persones nel escenariu procurando qu’asina seya.
Llevar un espectáculu como esti a los escenarios nun tien que ser xera fácil. ¿Tenéis intención de xirar dando más conciertos o van ser más bien poques les oportunidaes de vevos?
El directu ye un trabayu aparte, con, como dices, bastante sacrificiu y entrega. Queremos que los directos seyan una esperiencia igual d’especial que’l discu, polo que ye verdá qu’habrá espacios onde nun seya posible desendolcar esta propuesta. Sicasí, sabemos de munchos sitios nos que sí ye factible, y tamos en conversaciones con promotores pa da-y continuidá tamién a les puestes n’escena en directo.
«Cerezal dexaremos un tiempu más de merecíu descansu y tornaremos con coses nueves y la mesma enerxía de siempres»
Venís de Cerezal y ye inevitable facevos esta entruga. ¿En qué puntu s’alcuentra esta formación?
Cerezal agora ta tomando un merecíu descansu, dempués d’una llarguísima xira de presentación de La cereza’l cielu que tuvimos qu’interrumpir pol andanciu y que duró más de lo previsto. Casi refalfiamos de tocar esi directu una y otra vegada, y decidimos parar un poco y dedicanos a los otros proyeutos que caún de los miembros del grupu tenía en marcha o en mente. Dexaremos un tiempu más y tornaremos con coses nueves y la mesma enerxía de siempres.
Suscríbite a les nuestres novedaes
