El Teatru Xovellanos asoleya na so canal de YouTube un videu col conciertu completu de Lucas 15 dientro del ciclu Encaja2, grabáu’l pasáu 13 d’avientu. Depués de 9 años, Xel Pereda ufre un formatu en solitario, n’acústico, nel que presenta, amás de «Los fayeos de Mayo», versionada yá nel so discu de 2008, nueve cantares inéditos como «El penitente», «Ónde vas pol agua», «Agora non, vas cayendo» o «To casamiento y mio muerte», ente otros; dalgunes d’elles basaes en melodíes y lletres de la tradición asturiana.
Tres del so caberu conciertu en 2014, torna d’esta manera el proyeutu de rock alternativu Lucas 15, entamáu en 2006 xunto a Nacho Vegas, con siete temes inéditos a guitarra y voz, con delles lletres n’asturianu, y dos instrumentales. L’espublizamientu d’esti videu supón una oportunidá de volver a sintir al guitarrista de Llan de Cubel, Xel Pereda, nuna propuesta íntima y interesante.
Suscríbite a les nuestres novedaes
