Vuelve Tania Pereira. Tres de llanzar en 2021 el so primer trabayu de llarga duración, Un sueño dentro de un sueño -qu’incluyía dos temes n’asturianu-, esta cantautora va tornar na primavera con Rousa de Xericó. Nesti álbum nuevu va haber cantares n’asturianu occidental y en castellanu; yá salió’l primer adelantu, ‘Cometas‘; y esti vienres l’artista canguesa va actuar en La Salvaje d’Uviéu, onde se van poder sentir dalgunos de los temes del discu y conocer el so espectáculu nuevu pa los directos.
Una «cantautora electroacústica, qu’entemez los sos raigaños folk asturianos con afinaciones abiertes de guitarra influenciaes por cantautores británicos tres del so pasu per Londres y bases de percusión electrónica minimalista que crean un viaxe cinemáticu apoyáu poles sos voces, synths y vientos«, asina ye como define la so propuesta esta artista que foi componente del grupu folk Brandal y qu’en 2015 entamó’l so camín en solitario.
En Rousa de Xericó va afondar nesti camín. Conceptualmente’l discu xira alredor de la «rellación cola música y les rellaciones y emociones humanes en xeneral», desplica Pereira, matizando qu’analiza «cómo vamos atravesando momentos d’exaltación y sufrimientu dependiendo de les circunstancies o persones que nos ‘rieguen’». L’álbum va tener cinco temes n’asturianu y yá pue sentise ‘Cometas‘, un adelantu qu’avanza’l so soníu. Nesti tema la voz entemécese con «guitarres percutíes que beben del flamenco y el folk, mentanto les trompetes y los teclaos xeneren atmósferes envoltentes». La producción ta fecha a comuña ente Darío Barroso (Maro, Silvia Pérez Cruz) y l’escocés Luke Maher.
Esti vienres 21 a les 21.30h, na sala La Salvaje d’Uviéu y con un preciu d’entrada de 10 € va ser la primer oportunidá pa ver a Tania Pereira en directo y sentir tolo que ta entamando. Amás, estrena’l so espectáculu nuevu con una banda en formatu tríu. A la cantante y guitarrista van acompañala’l músicu de Bual Andrés Rodrigues Monteavaro a los sintetizadores, percusión y gaita y Luke Maher, productor del álbum y intérprete de la mayoría de los sos intrumentos (pianu, trompeta, guitarra). Un orixinal show que trai novedaes a la música asturiana y que Pereira define como un «viaxe con percusiones minimalistes electróniques y acústiques, vientos y pads de keys y sinths».
Suscríbite a les nuestres novedaes
