Les Xornaes del Vigulín Tradicional vuelven a L’Infiestu (Piloña) con una programación mui completa pa la so cuarta edición qu’inclúi talleres, conciertos, cursu, actividaes pa la reciella, una esposición homenaxe a Elías García y, como nes caberes ediciones, una sesión vigulinera y un vermú en danza. L’eventu entama’l próximu vienres 13 de setiembre a les 18h cola conferencia «Vigulineros ciegos nel noroeste peninsular» d’África Domínguez, a la que va siguir el IV Alcuentru de Vigulín Asturianu, ún de los actos centrales de la iniciativa. Amás de la Sesión Vigulinera que zarra’l primer día de les Xornaes nel bar-terraza El Patio, a les 22h del sábadu 14, el tríu de folk mozu Draque -Celia Nieto, Celia Corrales y Julio Rodríguez- y les gallegues Caamaño&Ameixeiras van actuar na Nueche Vigulinera.
Esti añu, el cursu de les xornaes ta dedicáu a la «Tradición vigulinera nel noroeste d’Occitania». Patrick Mazellier va impartilu’l sábadu 14 dende les 10.30h hasta les 18.30h n’El Prial y la inscripción yá ta abierta. El domingu 15 a les 10.30h, la Casa de Cultura va acoyer otra de les actividaes didáctiques d’esta edición, un taller d’iniciación al vigulín asturianu a cargu de Dolfu R. Fernández. Una hora más tarde, Santi Galguera y Rubén Bada comparten docencia nel taller de baille y acompañamientu del vigulín tradicional na Plaza’l Ganáu. A les 13h, Patrick Mazellier va amosar les melodíes occitanes col so vigulín y, darréu, el vermú en danza va pesllar estes IV Xornaes del Vigulín Tradicional.
Reciella vigulinera
La infancia tamién va tener oportunidá d’esfrutar estes IV Xornaes col conciertu de Pop Piquiñín a les 12h del sábadu 14 na Plaza’l Ganáu onde, a les 18h, África Domínguez va interpretar el cuentu musical «El vigulín de Ramonín».
La programación completa puede consultase equí:
Suscríbite a les nuestres novedaes
