Na música d’espresión asturiana tuvieron un pesu pergrande los soníos d’ascendencia tradicional y los que los renovaben al traviés del folk. Asina foi y sigue siendo —daqué normal y avezao nes músiques identitaries—, sicasí, adulces foron apaeciendo otres manifestaciones sonores que se mandaben d’influyencies estremaes y mui variaes.
Nos años 90 del sieglu XX el folk acústicu de calter célticu taba nel cumal, con una escena bayurosa y mui dinámica; yera’l tiempu tamién del surdimientu del Rock Astur, una escena que diba afitase na segunda metada d’aquella década.
Esta realidá yera omnipresente y de manera inconsciente prácticamente tapecía tolo que se saliere de la norma. Nesta situación, propuestes como la del avilesín Niko representaben una escepción dafechu y convertíense nuna rotura tocante al panorama sonoru del país. Detrás del nome de Niko taba Nicolás Garrido Labrado, qu’en payares de 1994 rexistraba una maqueta nos estudios EPROM d’Avilés con dos temes: ‘¿Qué facemos na tierra?’ y ‘Les fieres mecániques’.
Les pieces son un amiestu d’electrónica, spoken word y monólogu tradicional asturianu, una combinación cuanto menos mui llamadera, que cásique podemos considerala más un exerciciu d’estilu o un esperimentu sonoru qu’una propuesta musical al usu.
Otra manera, una d’estes composiciones diba zarrar l’álbum compilatoriu Sáca-yos la llingua (Discos L’Aguañaz, 1997), un trabayu que recoyía otru tipu de propuestes distintes a les imperantes daquella.
Suscríbite a les nuestres novedaes
