Yá ta en toles plataformes musicales ‘La Carbonera’, el cuartu adelantu que Marisa Valle Roso llanza del so próximu trabayu. Ye’l primer tema que presenta n’asturianu dafechu -tres d’incluyir dalgún fragmentu en ‘Cenicientes del Carbón’ y ‘El tren de la Libertad’- y la lletra ta dedicada a toles muyeres que trabayaron na mina. Amás, la cantautora llangreana llanza una iniciativa colectiva pa la realización de videoclip d’esti cantar.
«Encantaríame que’l videoclip de ‘La Carbonera’ seya tamién vuestru, asina que si tenéis semeyes de muyeres que trabayaron na mina, prestaríame que me les ficiereis llegar xunto coles sos histories a traviés d’un formulariu. Con tolo que m’unviéis enantes del 23 de mayu vamos crear un videoclip pa esti cantar que será’l nuestru homenaxe a toes elles», desplicó Valle Roso nes sos redes sociales. Les semeyes, testimonios y el nome completu van rexistrase nel videu y tamién nun «archivu vivu» na web de l’artista onde «van quedar recoyíos pa siempre los nomes y rostros d’estes muyeres valientes, munches vegaes escaecíes».
Esti single nuevu de Marisa Valle Roso continua’l compromisu social y la reivindicación de la memoria colectiva del pueblu asturianu que yá sonó nos adelantos ‘El tren de la Libertad’ y ‘Cenicientes del Carbón’. Musicalmente ye’l cantar más sele y desnudu de toos. «Juande y yo grabámosla en directo, ensin retayos nin pinchazos, poniendo l’alma de principiu a fin», comentó la cantautora al rodiu d’esti cantar producíu, grabáu y amestáu por Juan de Dios Martín (Xoel López, Amaral…), masterizáu por Miguel A. González y con revisión llingüística n’asturianu del escritor Pablo Texón. Entá nun hai fecha de llanzamientu del que va ser el cuartu trabayu en solitario de l’artista, pero con estos adelantos la llangreana ta amosando que va tornar con muncho puxu y ciñu.
Suscríbite a les nuestres novedaes
