Llevólu’l Sumiciu, Ferla Megía y Prestoso Fest son tres proyectos que trabayen por da-y puxu a soníos nuevos n’Asturies y los tres van dir de la mano esti sábadu 17 de mayu. El festival que se celebra del 7 al 9 d’agostu en Cangas de Narcea entama na sala El Sótano de Madrid dientro de la programación de Sound Isidro l’eventu Huellas del Prestoso Fest nel que van actuar los dos artistes asturianos emerxentes.
L’actuación va ser la carta de presentación de los tres proyectos na capital española y supón tamién la continuación de los conciertos conxuntos que davezu tán dando Ferla Megía y Llevólu’l Sumiciu. El primeru d’ellos foi a final de 2024 na La Salvaje d’Uviéu y l’anterior n’abril na sala Tizón de Xixón; en dambos vendieron toles entraes.
Con estes actuaciones los dos artistes presenten los sos nuevos trabayos. Páxaros 01 de Ferla Megía ye un EP qu’espeya la so evolución como artista hacia un estilu qu’amiesta xéneros como’l folk, el dembow, el trip hop y la electrónica. A la fin, la fusión ente la tradición asturiana y les tendencies d’anguaño. Llevólu’l Sumiciu, pel so llau, presenten l’EP, La Llobera, un discu qu’homenaxea a la música de raigañu asturiana nun contestu d’electrónica con ritmos y sonoridaes que pasen pel dembow afrolatinu y el Jersey club; too ello manifestándose nunos espectáculos que se completen con pieces audiovisuales.
Suscríbite a les nuestres novedaes
