Dos de los nomes mozos más destacaos de la música tradicional axúntense esta nueche en La Maléfica. El multiinstrumentista Rodrigo Joglar y la cantadora y percusionista María Latores van actuar dende les 20h nesti chigre que nació a finales de 2025 en L’Infiestu cola intención de, ente otres coses, ser un espaciu pal espoxigue de la música del país.
Rodrigo Joglar ye gaiteru y acurdionista -ente otros instrumentos- y mayestru de música tradicional. Tien participao n’infinidá de proyectos musicales, grupos de folk, como Verdasca o Loína y bandes de gaites como LaKadarma y trabayao n’estremaes escueles de música. María Latores ye mayestra dende fai 10 años, escritora y intérprete de canción asturiana. Entamó na tonada nel 2012 de la manu de Josefina Argüelles. Foi semifinalista del Premiu Nacional Obdulia Álvarez «La Busdonga» del 2025, ente otros reconocimientos.
«El repertoriu va ser cantares de chigre, tonada sola, tonada acompañada a la gaita, pieces de gaita… A lo meyor probamos tamién dalguna tonada a la voz y pianu«, desplica Joglar de l’actuación d’esta nueche xunto a Latores. Los dos músicos yá compartieron escenariu va unes selmanes nel proyectu de la Mocedá Rural Europeo que se desendolcó en La Benéfica, en dellos certámenes d’asturianada y, esta nueche, va ser una oportunidá nueva pa poder velos actuar xuntos.
Suscríbite a les nuestres novedaes
