La música asturiana sigue sumando sold out nun 2026 qu’arranca con puxu. Yá agotaron entraes l’espectáculu X Aniversariu de Gaiteros del Carbón, Rodrigo Cuevas n’Avilés, el IV Semando Fest, Ferla Megía n’Encaja2… y agora tamién Skama la Rede pal conciertu 20 aniversariu que van dar el vienres 20 de marzu nos Kuivi Almacenes. Estos fechos reflexen la vitalidá de la música’l país y l’interés que xeneren los distintos estilos que s’enmarquen dientro d’ella como la música tradicional, el rock astur, el folk o les propuestes más novedoses y actuales.
«Tamos ablucaos. Vender 500 entraes a una selmana pa nosotros ye dalgo inesperao. Namás podemos dar les gracies a toles persones que mercaron la entrada y a los collacios que van andechar nel conciertu, que tienen bona culpa d’ello», valora Miguel Fernandi «Burilo» sobre l’éxitu de convocatoria de la folixa del venti cumpleaños de Skama la Rede na que’l grupu va celebrar les más de dos décades que lleva de trayectoria y presentar el so últimu trabayu discográficu. Pa ello, la banda asturiana de ska-punk decidió entamar un conciertu especial que va durar dos hores y nel que van participar una quincena de músicos d’otres formaciones, tanto de dientro como de fuera d’Asturies.
Skama la Rede anunció que van collaborar cantantes asturianos como Xune Elipe (Dixebra), Daviz Rodríguez (Mala Reputación), Raquel (Ochobre), Pirri (Escuela de Odio), Humber (Misiva) y Delfo (La Tarrancha). Igualmente, el grupu tiene confirmaos a los músicos Xuan Rodríguez (Llan de Cubel y Matazúa), Natalia Menéndez (Ochobre), Daniel Álvarez (Corquiéu) y la gaitera candasina Aida Sánchez. Amás, quiciabes hai dalguna incorporación d’última hora.
Tamién van apaecer pel escenariu carbayón dos nomes bien conocíos de la escena estatal como son Juankar Cabano (voz y baxu de los madrilanos Boikot) y Gabri Reigosa (voz y guitarra de los gallegos Dakidarría). Amás, enantes y dempués del conciertu, el DJ Avante’l Pueblu va facer un esbilla musical con temes ska, punk, rock, rap y d’otres músiques alternatives y con discursu reivindicativu.
Esti conciertu -que va grabase en videu y audio cola intención d’asoleyar dalgunes partes nos próximos meses ye la continuación de los actos de celebración de les más de dos décades que’l grupu lluanco-candasín-maliayu lleva enriba les escenarios. Un cumpleaños que tuvo como fechu principal la publicación de 20 Años, un vinilu qu’inclúi ocho cantares y que vien acompañáu d’un llibru que resume la historia de la banda a traviés de testos d’escritores, periodistes, músicos y activistes culturales.
Suscríbite a les nuestres novedaes
