Güei inauguróse la cai Ígor Medio Tuya nel barriu d’El Natahoyo de Xixón, un homenaxe qu’aporta dos décades dempués desque’l músicu y dibuxante finara nun accidente de tráficu, xunto col so compañeru Carlos Redondo, cuando diben camín de Barcelona pa dar un conciertu de Felpeyu, grupu del que foi fundador. El reconocimientu llegó gracies a una iniciativa de la Sociedá Cultural Xixonesa que pidió que n’El Natahoyo, barriu nel que se crió l’artista, hubiera daqué n’alcordanza d’esta queridísima figura de la cultura asturiana. L’Ayuntamientu de Xixón dio’l preste a la propuesta, camudándo-y el nome a la cai Palafox pola d’esti creador.
L’alcaldesa Carmen Moriyón abrió l’actu n’homenaxe a Ígor Medio destacando la so figura: «Dibuxante atemporal, creador de La familia Castañón, y músico fundador de Felpeyu. Un vecín que retrató como naide la vida cotidiana de Xixón y que devolvió a la música tradicional asturiana’l so arguyu. Güei El Natahoyo fai xusticia con ún de los suyos«.
Llueu aportó l’emocionante discursu de Sonia Tuya, madre d’Ígor Medio. A lo llargo de diez minutos que fizo un agradecimientu a toles persones y colectivos que sofitaron esti reconocimientu, repasó‘l llabor artísticu y humanu del so fíu y reconocíó la figura de Luis Medio, pá d’Ígor y responsable d’inculca-y l’amor pola música. Amás sorrayó’l compromisu social de Medio, l’orixe de barriu y clase obrera de la so familia y en cómo too esto influyó na obra d’Ígor Medio Tuya. Tamién tuvo unes pallabres p’amistaes y familiares que-y dieron ciñu a lo llargo d’estos 20 años. Tampoco faltó’l reconocimientu a Norman Fernández, responsable de les reediciones La Familia Castañón y encargáu de catalogar tola obra d’Ígor Medio y de llevala al Muséu del Pueblu d’Asturies, pa facela patrimoniu de toa asturies.
«A Felpeyu, que nun se rindieron nunca. Contra too, contra tanto que-yos vino enriba ehí siguen; faciendo la so música y la música d’Ígor y Carlos. Poder siguir viéndovos enriba d’un escenariu ye poder respirar mui fondu«. Destacó Tuya n’agradecimientu al grupu que fundó xunto a Ruma Barbero y los Hermanos Castro en 1992. El so discursu remató faciendo un homenaxe a la vida comunitaria de los barrios d’El Natahoyo y Montiana, onde se crió Ígor; a la so cultura popular, a les sos lluches vecinales, a la música y a la solidaridá que perfilaron la identidá d’esta familia y d’esti músicu y gran persona arguyosu siempre d’Asturies, de la so cultura y de la so llingua.
Tres de la ovacionada intervención, Felpeyu tocaron n’acústicu ‘Canteros’ y ‘Los Fayeos de Mayo’ sonaron más emocionantes que nunca pa cantar como l’andarina volvió con esti homenaxe a la so casa, a El Natahoyo.
Semeya esbillada de les redes sociales de Carmen Moriyón.
Suscríbite a les nuestres novedaes
