La historia recién d’Asturies nun se podría entender ensin dos fechos fundamentales: la güelgona de 1962 y el Tren de la Libertad de 2014. Per un llau, ta la llucha obrera de la minería asturiana y el papel cimeru que tuvieron les muyeres pa caltener encesa la llume de la reivindicación; pel otru, una movilización feminista d’ámbitu estatal pero con orixe en Xixón y Llaviana que bregó contra la reforma de la llei del albuertu del ministru del PP Alberto Ruiz Gallardón. A estes dos pelees pola xusticia social homenaxea Marisa Valle Roso nos sos nuevos cantares.
Güei asoleyó’l single y videoclip ‘Cenicientes del Carbón‘, el tema cola que la cantautora llangreana fai alcordanza de la llucha de les muyeres durante la güelgona de 1962. Con una cuidada producción musical -los músicos de grabación fueron los asturianos Ramsés Ilesies, Manuel Cordero, Pablo Carrera y Fernando Valle Roso, amás del productor gallegu Juan de Dios Martín- y audiovisual, el cantar repasa dalgunos de los fechos que vivieron eses muyeres: los güelpes nes celdes colos sos tacones; que la Guardia Civil rapára-yos el pelo; el maíz pa los esquiroles; la sororidá y la dignidá.
El videu ta realizáu por Juan A. Ros, con producción executiva d’A Mansalva y nellos les protagonistes son tres muyeres bien conocíes de la cultura asturiana: la directora de Muyeres Marta Elola; la periodista y escritora Aitana Castaño; la educadora social y profesora de danza Candela Guerrero. Toes elles homenaxeen a Anita Sirgo, Tina Pérez y Celestina Marrón, «muyeres que nacieron y vivieron ente’l carbón y la povisa y convirtieron el zapatu de tacón nun símbolu de rebeldía contra quien oprime, esclaviza y castiga», como declaró l’artista nes sos redes sociales. Na obra tamién tien un papel importante’l baille contemporáneu, cola interpretación y coreografía de Gloria Borje; amás del patrimoniu industrial de la Cuenca’l Nalón, que ye l’escenariu de la historia.
El primer de los adelantos de lo que va ser el trabayu nuevu de Marisa Valle Roso –entá ensin fecha de salida anunciada– s’asoleyó’l pasáu 28 de febreru. Ye ‘El tren de la libertad‘, un cantar que nel que punxeron los coros muyeres de la Tertulia Feminista Les Comadres de Xixón y Mujeres por la Igualdad de Barredos; los dos colectivos que prendieron la llume d’El tren de la libertad que salió dende delles ciudaes del Estáu español camín de Madrid pa dar aniciu a la primera gran manifestación feminista de los últimos años. Más de 30.000 persones percorrieron les cais escontra la reforma de la llei del albuertu de Gallardón y, ocho meses dempués d’aquel fechu, ganaron. La llei fracasó y el entonces ministru de Xusticia del PP dimitió. El videoclip recueye imáxenes d’archivu d’aquella movilización histórica en defensa de los derechos reproductivos y sexuales de les muyeres.
Cola publicación d’estos dos temes nuevos, Marisa Valle Roso sigue avanzando nel camín qu’entamó en 2017 con Consciente. Nél, separtóse de l’asturianada -el xéneru col qu’entamó a xubir a escenarios y a ganar una montonera de los reconocimientos- pa esplorar les posibilidaes de la canción d’autor y el pop, con influencies de la electrónica. En 2022 llanzó Lo Fugaz y, tres d’años de trabayu baxo la producción del prestixosu Juan de Dios Martín (Xoel López, Amaral, Los Secretos…), vuelve agora a l’actualidá discográfica cola publicación d’estos cenciellos. Llingüísticamente, los temes tán en castellanu -con dalgún estribillu y frase n’asturianu-, sicasí, la identidá y historia asturiana ta bien presente nestos temes enraigonaos nel territoriu onde nacen.
Suscríbite a les nuestres novedaes
