Ayeri, domingu 21 de setiembre, nel marcu del Cachu Fest, cellebróse en Trabáu un homenaxe a Rosa Rodríguez Menéndez, más conocida como Rosa Cunqueira. Nel actu inauguróse una escultura a tamañu real de Rosa sentada tocando’l pandeiru n’un bancu a la entrada de La Guarida del Cunqueiru, esi taller y muséu que so familia sigui calteniendo.
Amás, el gaiteru César Gracia estrenó una pieza compuesta n’alcordanza d’ella, ‘Anada a Rosa Cunqueira’ que ya cunta con videoclip disponible en YouTube. Na grabación, fecha por Sergio Tutu, participaron los músicos Javi Tejedor y Rubén Bada. El vídeo ye obra d’Alex Galán, con imáxenes de la película Il Mulín. La música suena n’un momentu a la par qu’un poema recitáu por la propia Rosa, ‘Quixira’ del so audiolibru interactivu ‘Suenos. Versos cunqueiros’ que foi grabáu en collaboración con Cuatro Gotes Producciones.
Los asistentes ficieron dempués un pasucáis con música y baille per Trabáu. Esti homenax pretende ser una cita anual, n’alcordanza d’una persona que queda na memoria de munchos y munches como una referente na defensa de lo propio, de la vida nel rural y la cultura tradicional, y que siempre destacó pola so cercanía y hospitalidá.
Suscríbite a les nuestres novedaes
