Güei entamen los XXX Talleres d’Improvisación Musical, xornaes entamaes pol Taller de Músicos de la Fundación Municipal de Cultura, Educación y Universidá Popular (FMCEyUP) de Xixón qu’axunten delles actividaes rellacionaes col arte de la improvisación. Dientro de la programación hai una charra abierta a tol públicu -pa toles demás actividaes había qu’inscribise previamente- que tien l’oxetivu de dotar de ferramientes a intérpretes pa face-y frente al mieu escénicu. La cita va ser esti martes 8 a les 18.30h nel Centru de Cultura Antiguu Institutu y va ampliase con un taller esclusivu pal alumnáu de les xornaes.
«L’ansiedá escénica ye una fobia social qu’afecta al colectivu de la interpretación musical durante les presentaciones, impactando nel so rendimientu y confianza. Ye fundamental que los músicos, amás de la so formación técnica, reciban preparación metal pa xestionar esta ansiedá, meyorando’l so rendimientu y previniendo problemes de salú mental». Con estes pallabres la FMECyUP presenta la charra que va dar el psicólogu y saxofonista asturianu Chus Vega. Esta cuestión tamién va tratase nos talleres ‘Cambia en 4 horas cómo subes al escenario’, qu’imparte’l mesmu Vega a l’alumnáu junior de los talleres.
Con estes acciones los Talleres d’Improvisación Musical van acullá de la música y traten cuestiones de salú mental que tan presentes tán na actividá de los y les intérpretes d’instrumentos. Ye un pasu más na formación d’un programa que dende 1996 lleva puxando pol «conocimientu y la difusión del jazz y les músiques improvisaes, ponéndoles en rellación con otros xéneros, estilos y disciplines», como planteguen dende’l Taller de Músicos de Xixón.
Suscríbite a les nuestres novedaes
