Vienres 4 de xunetu, diez de la nueche, La Vega La Portiella de Llanes: nun hai ónde aparcar. Bona señal. Ye la presentación de Resollu, el discu nuevu de la Banda Gaites Llacín. L’escenariu ta separtáu de la carpa… nun lo esperaba asina, pero caro, ye que nun cabe dientro, nin por anchor nin por altor. Ye un trailer inmensu con una plataforma delante pal grupu de baille. Ente la carpa y l’escenariu, una montonera xente tremenda. Menos mal que nun llovió, porque na carpa nun cabíen toos.
Pongo a funcionar la grabadora del móvil y entamo a facer semeyes. Voi decatándome de les dimensiones d’esti espectáculu. Subíes nel escenariu hai 30 gaites resollando, 12 caxes restallando y siete timbales y un bombu retumbando. Esa ye la banda de gaites, a la qu’hai que sumar al so director Vítor Carbajal, qu’algamó, amás de facer el so llabor de direición, tresmitir al públicu la enerxía que se volcó nesti proyectu, y l’entusiasmu y l’esfrutar del momentu que taba viviendo.
El conciertu entamó con Steir, una composición de Vítor Carbajal, que fai homenax al ríu que pasa pela villa bretona de Kemper, onde la banda tien participao nel festival en delles ocasiones. Siguieron con Xiringosa, un amiestu de temes populares asturianos. Brétigu foi’l tercer tema, otra composicón del director. Yá dende l’entamu, sentir a la banda con esta puesta n’escena y cola fuercia cola que suenen les igües ye dalgo qu’impón; presta sentilo así, métete dientro’l conciertu y sorprende.
La Danza de Ponga foi’l primer tema cantáu, con Xosé Ambás a la voz. Payares foi un set que mezcló estremaos ritmos de la tradición musical asturiana, con dances, xotes y muñeires. Siguió’l conciertu cola interpretación de Los Fayeos de Mayo, un tema col que la banda quixo facer un sentíu homenax a Ígor Medio y Carlos Redondo, dos músicos que dexaron un posu incalculable na escena folk asturiana. Pa facelo tovía más especial, estrayeron el bouzouki y la voz d’Ígor de la grabación orixinal, y ficieron unes igües respetando los esquemes del tema pa poder tocar sobro ello. En rematando, pidieron a Sonia Tuya, madre d’Ígor, que xubiera al escenariu p’agradece-y la so collaboración y disposición, dando-y un discu y un vinilu coles firmes de tolos músicos que pasaron pel escenariu.
Otra composición de Vítor, Resollu, la que-y da nome al discu, treslladó les marees y la fuercia de los bufones, reflexaes nes gaites y les percusiones, acompañaes pola seición de vientu metal. El tema cuntó amás cola collaboración de José Ángel Hevia a la gaita elléctrica.
Los temes son variaos, y les estructures y les igües van faciendo un conciertu entreteníu, nel qu’amás de Vítor, dellos músicos van presentándose ente ellos y introduciendos los temes, desplicando l’orixe, el sentíu y falando del procesu de grabación, d’ensayos…
«Subíes nel escenariu hai 30 gaites resollando, 12 caxes restallando y siete timbales y un bombu retumbando. Esa ye la banda de gaites, a la qu’hai que sumar al so director Vítor Carbajal, qu’algamó, amás de facer el so llabor de direición, tresmitir al públicu la enerxía que se volcó nesti proyectu»
En Viodo, presentaron un tema qu’axunta la danza del conceyu Gozón col cantar de La Molinera, al que siguió Nayloe, composición de Vítor dedicada a so madre, con un arreglu final fechu por Sergio Rodríguez ‘Tutu’. Santa Marina Parres ye un tema que foi recoyíu pol ATOAM a la madre de dos componentes de la banda, y qu’axuntaron con una xirandiya presente na zona oriental y central d’Asturies.
Tamién hubo un momentu p’alcordase de los anteriores trabayos discográficos de la banda. Xideces ye un tema del anterior discu, que decidieron tocar na presentación, y que ta dedicáu a los teyeros del conceyu Llanes, quienes teníen una llingua propia pa comunicase ente ellos: la xíriga. Xideces ye un términu xíriga que se refier a les coses prestoses. Con Lorient 2022, fízose alcordanza de la participación de la banda nel festival bretón, xuntando temes tradicionales y composiciones bien conocíes n’Asturies.
Chan Chan foi una sorpresa, y una forma d’alcordase d’esa estrecha rellación qu’hai ente Cuba y Asturies, con un arreglu bien prestosu y orixinal nel que pudimos esfrutar d’un momentu bien entreteníu de diálogos ente la flauta y la sección de metales. El tema que zarró’l conciertu (ya’l qu’abre’l discu) foi Camín de Glasgow, un amiestu de melodíes escoceses, con igües del grupu Llau nel primer tema.
Ya falamos de la banda y el repertoriu, y queda la otra metá de lo que foi esti conciertu memorable: la veintena de músicos que collaboraron cola banda. Ente ellos, taba la formación completa de Felpeyu, con Aníbal Menchaca (baxu y voz), Lisardo Prieto (vigulín), Diego Pangua (xiblata, gaita), Ruma Barbero (bodhrán), Alberto Ablanedo (bouozuki) y Luis Nicolás (guitarra). Amás, sumáronse a la seición de cuerda Julio Rodríguez (Draque, Llan de Cubel, Loína, Herbamora…) y Paul Balmori (Baxel, Corquiéu) col bouzouki.
«Los temes son variaos, y les estructures y les igües van faciendo un conciertu entreteníu, nel qu’amás de Vítor, dellos músicos van presentándose ente ellos y presentando los temes, desplicando l’orixe, el sentíu y falando del procesu de grabación, d’ensayos…»
Dos flautistes que son ya más qu’una referencia pasaron tamién pol escenariu: Dani Álvarez y Pepín de Muñalén. Na seición de vientu tamién participaron colos metales Leo Pousa al trombón, Kiko Flores al saxo y Miguel Herrero a la trompeta. No tocante a les voces, collaboraron Xosé Ambás, Lluci Palomares y Mónica Delgado. Israel Sánchez a la batería y Richard García a los teclaos completen esti elencu d’auténticos profesionales; esos que saben qué facer y cuándo. Y por supuestu, el Grupu Etnográficu l’Oriente, con Santi Galguera na direición, que supieron aportar lo que nun-y podía faltar a esti espectáculu: que la música se baillase.
Razones nun faltaben pa quedar cola boca abierta ante too esti despliegue, pero tovía hai que mencionar otru detalle más col que muncha xente siguió sorprendiéndose: sonidazu, nada fácil teniendo en cuenta qu’había de media 60 músicos nel escenariu. Foi daqué que la banda agradeció, tanto a la empresa de soníu, como a los técnicos de lluces, y sobremanera a Sergio Tutu (al mando de la PA), quien tamién fue parte de la producción del discu.
Dos cámares rexistraron el conciertu; esperemos que s’espublice’l resultáu, pa que los que fuimos podamos saciar les ganes de volver a sentilo, y pa que los que nun fueron puedan esfrutalo, porque de verdá, paga la pena.
Col conciertu de la banda yá yera más que suficiente pa zarrar la nueche por tolo alto, pero ye que dempués tovía pudimos esfrutar de les actuaciones de Felpeyu, colos sos cantares míticos, y de Baxel, nun formatu bien prestosu nel que participaron, xunto a Paul Balmori y Rigu Suárez, Dani Álvarez col bodhrán y Richard García nos teclaos.
Foi una presentación especial, na que sí, destacó’l bon facer y el trabayazu no musical tanto de la banda como de la xente que collaboró, pero na que tuvo casi más valor la implicación, el trabayu n’equipu, la ilusión y la enerxía qu’ente toos algamaron tresmitir. D’esti conciertu, y sabiendo tolo que conlleva, digo qu’a munchos prestaríanos poder volver a vivilu… Y asina va ser, porque la Banda Gaites Llacín yá anunció que va siguir representando esti espectáculu enriba los escenarios. Mesmamente, la próxima cita va ser el vienres 29 n’Arenas (Cabrales) a les 21h. Dempués de too esto, queda dar les gracies a la Banda Gaites Llacín, y a tola xente implicao na presentación por ufiertanos estos momentos y por tresmitir como ficieron.
Suscríbite a les nuestres novedaes
