Misiva anuncien conciertu X+2 Aniversariu pal 12 de marzu n’Uviéu

En 2020 Misiva cumplía 10 años enriba los escenarios y, amás de cola la publicación del curtiu musical ‘L’Últimu Aliendu‘, la banda moscona cuntaba con festexalo dando un conciertu especial. Pero aportó l’andanciu, nun pudo ser y el grupu de punk-rock tuvo cuasi dos años ensin xubir a un escenariu, pudiendo actuar namás n’Amosando, nun conciertu nel so llocal d’ensayu qu’emitieron online, nel Kuivi PopUp y con una actuación acústica nel programa Héroes Ensin Nome. Pero agora aportól’ momentu.

El próximu 12 de marzu a les 21.30h, la sala Gong d’Uviéu va acoyer el conciertu X+2 Aniversariu de Misiva col que repasen estos doce años n’activo. Nun comunicáu anuncien que va ser «un conciertu especial, con delles sorpreses y invitaos». Amás dexen l’interrogante de si van sonar temes nuevos y avancen que tán a piques «de publicar dalgo mui gordo» que teníen ganes d’amosar. «Pero eso, pa otru día…», remata’l grupu na so publicación de redes sociales, a traviés de les que van dir anunciando les sos novedaes.  

Les entraes pal conciertu de la sala Gong -nel que van tar acompañaos de Los Bárcenas-, yá se pueden mercar online o en La Bomba Records d’Uviéu por un preciu anticipáu de 10 euros.

Doce años de punk-rock

Misiva ye una de les bandes más renomaes de la escena punk-rock d’Asturies. La so trayectoria principió en Grau en 2010 y ta marcada por facer un punk-rock rápidu y melódicu, influyíu por nomes de la escena californiana como Bad Religion o Rancid. Anque los sos trés primeros discos tán en dos versiones -una toa n’asturianu y otra toa en castellanu-, dende’l cuartu trabayu yá namás asoleyó la versión n’asturianu, llingua na qu’interpreten tamién tol so repertoriu en directo y que sonó en festivales tan prestixosos como’l Resurrection Fest o’l Tsunami Xixón.

Comprar discos de Misiva na tienda online