Guieldu preestrenen ‘L’Aremu’ el domingu 13 na canal de YouTube de musicasturiana.com
El próximu llunes 14 de febreru va asoleyar en toles plataformes dixitales ‘L’Aremu’, el primer cenciellu del grupu de música celta y new age Guieldu. Sicasí, un día enantes, el domingu 13 a les 22.30h, Musicasturiana.com va estrenar n’esclusiva na so canal de YouTube los dos cantares que formen esti llanzamientu: “L’Aremu” y “Irish Flead”.
“L’Aremu” ye un cantar que ta basáu na Danza de Cortes (tradicional asturiana del conceyu Quirós) y la Diana de la Sobarriba (tradicional de Llión), mentes que “Irish Flead” ye un set instrumental de tres reels irlandeses (The Kilfenora Reel, McDonagh’s Reel y The Musical Priest). Amás del estrenu en YouTube, la formación pon a disposición del públicu un enllaz pa que la xente puea añadir previamente’l single nes sos llistes de reproducción de Spotify, Apple Music, Deezer o Tidal y qu’ésti tea disponible’l mesmu día del llanzamientu oficial.
Na seronda de 2019 presentóse a traviés de les redes sociales esti nuevu proyectu de música asturiana formáu por siete componentes que tienen ente los 19 y los 29 años. ‘L’Aremu’ ye un reflexu de lo que nagua por facer Guieldu: traer a l’actualidá les sonoridaes de la música delta de los 90 y 90, fusionándolos con estilos como’l new age p’asina averar la música de raigañu tradicional a nuevos públicos.
