Música balcánica, asturiana y electrónica danse la mano con DRB

Va unos díes s’asoleyaba’l single y videoclip «La Panadera«, un orixinal tema qu’entemez una asturianada con una Geampara -danza folclórica de Rumanía- y con música electrónica. Tres d’esta pieza ta Carlos García, filósofu y músicu que per muncho tiempu tuvo xubiendo a los escenarios baxo’l nome de Dr. Balkan y qu’agora fáilo con DRB, un proyectu que, nes sos propies pallabres «nun ye namás una fusión d’estremaes tradiciones musicales; ye tamién una esploración de los propios raigaños culturales y un convite a reflexonar alrodiu la identidá, la pertenencia y la tresformación a traviés de la música».

Con esta filosofía, DRB tien publicaos yá cuatro temes de los que l’últimu ye «La Panadera». «L’espíritu d’esti ye’l mesmu que’l del proyectu: investigar cómo la identidá se redefine y tresforma cuando s’enfrenta a les llendes xeográfiques, culturales y personales», desplica’l músicu matizando que nesti casu usa «melodíes del llugar d’orixen, sacándoles de contestu y llevándoles acuyá de les llendes naturales pa que surdan coses nueves». Asina ye como nesti casu «suena un bouzuki griegu y too va entemeciéndose a traviés d’un ritmu irregular penriba una base de música electrónica».

«Ye verdá que’l proyectu naz del mio interés pola música balcánica, pero siempre tuvi la idea de facela dialogar cola d’Asturies», comenta esti artista qu’enantes «yá facía esta mecigaya con temes como «Tengo de subir al puertu«, ente otros». Sicasí ye la primer vez que graba y publica dalgo d’esti calter. Mesmamente «Destierro«, otru de los cortes que tien asoleyaos, «fala sobre los vaqueiros», usando pa ello dellos samplers con testimonios orales.

El Presi a ritmu de gwana

«Agora mesmo toi trabayando n’otru tema que tien por nome Abdel-Presi, nel que s’entemez la música tradicional gwana -un son d’orixe marroquí- col cantar «Xilguerín parleru»», avanza l’alter egu de DRB. El cantar va estrenalu esti sábadu per primer vez en Rabat dientro d’un eventu que ta entamando xunto a DJ CHABBA 3HAFIFA: «Va llamase FOLIT’XTA7, un amiestu ente folixa y chtah, que significa baillar en darija marroquí». D’esta manera, sones de dambos países van dir de la mano na primer folixa astur-marroquí p’asina llevar al escenariu esta frase cola que s’autoidentifica DRB :«la creación naz nos márxenes, nesi espaciu onde les llendes desvanécense y lo habitual, dexa de selo».