La plaza de Les Aceñes torna a ser l’escenariu de la Seronda n’Avilés qu’entamen Xuntanza Avilés -Xaréu d’Ochobre y Escontra’l Raigañu- esti fin de selmana. Ente’l vienres 25 y el sábadu 26 va haber música, baille tradicional, gastronomía y actividaes pa la reciella na carpa del entornu del mercáu, un eventu qu’aporta a la XXI edición esti añu. Les actuaciones van correr a cargu de Bandina Cuatrolán, Xaréu d’Ochobre, Escontra’l Raigañu, Marta Elola y Arella, Amigos del Chigre, 6 Riales y Pandereteros d’Anguañu.
El vienres 25, l’Asociación Cultural de Piniella encárgase d’abrir les actividaes con música popular y un chigre con productos de seronda dende les 19h. A les 19.15h, la Bandina Cuatrolán -que tamién actúa a les 21.30h- inaugura oficialmente la Seronda, dexando pasu dende les 20h a una amuesa de sones y bailles tradicionales con Xaréu d’Ochobre y Escontra’l Raigañu. Marta Elola y Arella zarren la nueche con un conciertu a les 22h.
Per otru llau, a les 12h del sábadu 26, l’Área Tradicional de la Escuela Municipal de Música «Beatriz Osorio» de Bembibre (Llión) abre la carpa y, a les 12.30h los Amigos del Chigre van compartir unos cantares. La tradicional xinta popular con pote de berces y arroz con lleche ye a les 14h y, dempués de comer, la reciella va poder esfrutar del cuentu Efectos Naturales. A les 19h, la formación de Bembibre va ufrir una amuesa de música y baille tradicionales. Pa finar, dende les 20.30h va celebrase una Nueche en Danza colos grupos 6 Riales y Pandereteros d’Anguañu. La programación completa pue consultase equí:
Suscríbite a les nuestres novedaes
