Les fiestes El Pote de Santa Bárbola, nel conceyu de Samartín del Rei Aurelio, celebren una nueva edición dende esti vienres 22 al llunes 25 d’agostu. Nelles la música asturiana va tener espaciu dientro la programación coles actuaciones del Grupu Folclóricu L’Esperteyu, la Bandina Gaites Valle del Nalón, Pandereteros d’Anguañu y el Festival de Canción Asturiana. Tamién va haber un taller de baille.
La música’l país arranca’l vienres 22 a les 19h con una pareya de gaita y tambor que marca l’entamu de les fiestes y una actuación del Grupu Folklóricu L’Esperteyu a les 20h. El domingu 24 ye’l IX Mercáu Artesanal nel que los sones de raigañu van tener mayor presencia. Pela mañana actúa’l Grupu Folklóricu L’Esperteyu con dellos pases y pela tarde la Bandina Gaites Valle del Nalón. A les 18h va haber un taller de baille asturianu impartíu por Luis Ángel Fernández Santos de Prau Llerón y a les 19.30h ye’l conciertu del tríu de música tradicional con lletres anovaes Pandereteros d’Anguañu.
La programación de música n’asturianu complétase’l llunes 25 col Festival de la Canción Asturiana. Nél van actuar Lorena Corripio López (campeona d’asturianada de Colunga), Isaac Sierra Longo (campeón de Parres) y Néstor Díaz González (campeón xuvenil de Llanes).
Suscríbite a les nuestres novedaes
