Nacho Vegas publica un discu nuevu d’estudiu tituláu Vidas semipreciosas, un álbum que sal a la venta cuando’l cantautor xixoniegu ta a piques de cumplir 25 años de trayectoria musical. Esti trabayu, que ye yá’l docenu d’estudiu, afonda no político y no personal, faciendo un percorríu pa crealu ente Xixón, Colunga y Piloña.
Nun ye l’asturianu l‘únicu idioma minorizáu‘l qu’apaez nesti álbum de Vegas; l’euskera y el catalán apaecen en dos de los catorce temes que componen el discu. Son, precisamente, dos interludios que lleven los nomes d’Anna y Adur. La llingua asturiana tamién apaez, amás, de manera simbólica, nel cantar que-y dedica a Cristina Vegas, ma del cantautor, y que titula ‘Fíu’, y en ‘Deslenguarte’, nel que collabora Albert Plá.
«El cantar ‘Seis pardales’ ye’l más políticu de los trés asoleyaos n’asturianu. Trátase d’un tema dedicáu a Les 6 de La Suiza, sindicalistes de Xixón que fueron condergaes por defender los derechos llaborales y sindicales»
‘Les ales’ ye la primer propuesta que Vegas nos presenta nesti Vidas semipreciosas n’asturianu, una versión de ‘txoria-txori’ de Mikel Laboa, el gran himnu de la música euskaldun. Un tema mui poéticu nel que fala metafóricamente de les aves pa facer referencia a la llibertá y al amor entendíu d’una manera contraria al sentimientu de propiedá.
El cantar ‘Seis pardales’ ye’l más políticu de los trés asoleyaos n’asturianu. Trátase d’un tema dedicáu a Les 6 de La Suiza, sindicalistes de Xixón que fueron condergaes por defender los derechos llaborales y sindicales y qu’entá anguaño cumplen el tercer grau penitenciariu. Nacho Vegas fala equí de «la mesma hestoria de siempre» y denuncia esti casu sindical que ye tristemente conocíu en tol estáu español. No musical, el cantar ye una adaptación de ‘El chaflán nº8‘, unu de los cantares de la Revolución d’Ochobre del 34 y que tiempu depués espublizara’l Grupu Cultural Xana, y nél collaboren Rodrigo Cuevas y L-R.
L’últimu tema del discu ye tamién n’asturianu, como pasara nel trabayu Mundos inmóviles derrumbándose. Ye ‘L’acabose’, un tema qu’afonda nes despedíes y tolo qu’entá queda por cuntar y cantar neses «vides y coses semiprecioses», onde tamién apaez l’euskera nuna conversación.
Nacho Vegas entama amás, tres la publicación del discu, la so xira. L’artista va facer dos paraes n’Asturies; una’l 30 de xineru en Mieres y, al día siguiente en La Benéfica de L’Infiestu. Dambes actuaciones tienen el cartel d’entraes agotaes dende va tiempu.
Suscríbite a les nuestres novedaes
