Dende güei xueves 4 y hasta’l domingu 7 de setiembre L.luarca acueye La Favorita de Xuan Bello, Festival de Cultura Contemporánea. Performance, poesía escénica, instalaciones, danza contemporánea, audiovisuales… son dalgunes de les artes que van tar presentes nesti eventu qu’homenaxea a esti pernomáu escritor fináu hai poco más d’un mes. La música’l país tamién va tar presente en dos espectáculos: ún de Monteavaro, Muñalén y Rodrigues; y otru de Flavio R. Benito, Diego Lobo y la Banda Gaites Saxum.
«Ye una performance de poesía espandida onde axuntamos música tradicional, electrónica y lliteratura«, desplica Miguel R. Monteavaro sobre l’espectáculu Homenaxe a Xuan Bello que van estrenar esti xueves a les 22.15h na Plaza Severo Ochoa de L.luarca. Nella Monteavaro va recitar testos propios y de Xuan Bello, Pepín de Muñalén va tocar el saxu y la flauta y Andrés Rodrigues «tien la gaita y otros instrumentos tradicionales pasaos por milenta sintetizadores y encárgase de la producción de tola parte sonora», añade l’escritor y músicu.
«Preparámoslo nesti últimu mes dempués de la muerte de Xuan pa face-y un homenaxe y conectar esa poesía suya con otres formes d’espresión qu’él ya entamó cuando fizo’l discu La Voz del Ríu con Flavio R. Benito», comenta Monteavaro al rodiu esti espectáculu que «da otra voz a esos poemes y reivindícalos». Dempués de l’actuación d’esta nueche, los trés músicos van volver a ponelu n’escena na Nueche Blanca d’Uviéu‘l próximu 4 d’ochobre.
D’otra banda, los gaiteros Flavio R. Benito, Diego Lobo y la Banda Gaites Saxum van facer la intervención sonora Músicas ancestrales el vienres 5 a les 20.30h nel Puertu de L.luarca. «Va ser un conciertu de 50 minutos nel que vamos interpretar pieces del repertoriu asturianu, ente los que preparemos unos cantares vaqueiros pa la ocasión», avanza Diego Logo. «Tamién vamos tocar una pieza compuesta por Flavio, que se llama como’l poema de Xuan Bello, ‘Nel Picu Mul.leirosu’«.
Cunta’l gaiteru que la idea d’esti espectáculu yá vien d’atrás: «La lo que teníemos pensao yera facer un conciertu en base a Xuan Bello y nel que participara él. Teníemos que quedar con él, pero llueu pasó la desgracia de que nos dexara repentinamente». Por eso, l’actuación d’esti vienres ye un homenaxe y la primer puesta n’escena de lo que yá taben entamando a comuña.
«Cuando lu conocí nun sabía tol llegáu de Xuan. Él tratóme xenial dende l’entamu: ayudóme un montón, siempre tiró de mí y, dempués, col pasu del tiempu, entendí que nun lo fixera conmigo namás, sinón que lo fixo con varies xeneraciones d’escritores n’Asturies», valora Miguel R. Monteavaro al rodiu la figura de Xuan Bello. Una persona que define como «pá de la lliteratura asturiana moderna» y «el mayor referente internacional«: «Yo cuando voi a los festivales pel mundu, cuando digo que soi d’Asturies, en delles ocasiones yá me dixeron: ‘ah, n’Asturies hai un escritor mui famosu que se llama Xuan Bello'».
Pa Diego Lobo, Xuan Bello «ye’l máximu esponente de la lliteratura n’asturianu«. «Yo medré con él nel institutu; conocílo gracies al profesor que teníemos n’asturianu y parezme que vamos tardar en tener a dalguien que s’asemeye a él». El so llegáu ye enorme y la música’l país va siguir faciéndo-y alcordanza tres de la so perda, como amuesen estos dos espectáculos.
Suscríbite a les nuestres novedaes
