Naz Burbús, nuevu grupu de música asturiana formáu por veteranos de la escena

A les gaites y flautes, José Luis García -director de la Banda de Gaites Villa de Xixón, Magüeta y Villa de Jovellanos-; al violín, Juan Diego Gómez -que tien tocao en proyectos d’estilos tan estremaos como’l folk, rock, techno, gypsy jazz o heavy metal-; al curdión, Ginés Fernández -músicu de formación clásica que tocó n’agrupaciones d’esti calter y tamién bandes folk-; a la voz y a la guitarra José Martínez -más conocíu nos últimos años como Ún de Grao gracies al so proyectu en solitario, anque tien tocao nuna montonera bandes-; y al baxu, chelo y coros, Javier San Marcos -venceyáu a grupos jazz y blues-. Estos cinco veteranos de la escena sonora asturiana formen Burbús, proyectu nuevu del que dicen que «nun tien xéneru musical, pero la nuestra música ye xenérica en sí mesma».

«La música tradicional foi’l puntu de partida, pero rápidamente garremos el camín pa dir hacia un llugar alloñáu de categoríes y estilos musicales concretos», comenten dende esta formación que nel so repertoriu tien «una mecigaya de temes propios y revisiones de pieces tradicionales». El grupu nació en 2021 alredor del gaiteru y flautista José Luis García y el violinista Juan Diego Gómez y dende esi momentu fueron incorporando a los demás componentes y trabayando n’alcontrar la so personalidá.

Burbús garra’l so nome del verbu burbusar -que ye falar en voz mui baxo con daquién pa que nun s’enteren otres persones de lo que se diz-; anuncien que nes próximes selmanes van asoleyar nes plataformes dixitales dalgunes pieces, amás de llanzar un videoclip. Mentanto, pue vese y sentise un teaser que resume la escencia d’esti proyectu nuevu.

Dexa un comentariu

X