Musicasturiana.com entama’l Semando Fest, el primer festival de música moza n’asturianu

El 4 de febreru la sala Lata de Zinc d’Uviéu va acoyer el Semando Fest, primer festival de música moza n’asturianu. Musicasturiana.com entama esti eventu nel que van participar cuatro grupos de distintos estilos y con una característica común: tener componentes menores de 34 años. La iniciativa trata de puxar pol relevu xeneracional na música asturiana; por ufrir un festival con un formatu orixinal qu’entemeza aspectos d’una gala colos d’un conciertu al usu; reivindica les sales de conciertos como un espaciu afayadizu pal exposigue de la música de raigañu y tamién ye l’eventu col que Musicasturiana.com quier festexar más de cinco años d’actividá.

¿Por qué la mayoría de músicos que toquen nos principales eventos de la música asturiana tienen más de 20 años de carrera al costazu? ¿La mocedá conoz la música de raigañu? Hai muncho alumnáu nes escueles de música tradicional, pero ¿por qué nun salen nuevos grupos d’elles? ¿Cuándo rompió aquella fola de tantos grupos folk que surdieron nos años 90 o de grupos rock que nacieron nos 2000? En definitiva, ¿Hai relevu xeneracional na música asturiana?. Estes entrugues y más son les que faen que surda la necesidá de desendolcar un proyectu como esti Semando Fest.

A partir de la selmana que vien Musicasturiana.com va entamar a anunciar los nomes de les y los artistes que van participar nesti festival nuevu, amás de les distintes persones que formen l’equipu de trabayu del eventu. Siguiendo cola filosofía de da-y oportunidaes a les y los creadores xóvenes, toles persones implicaes nel Semando Fest son xente mozo, con edaes comprendíes ente los 18 y 34 años. Amás l’equipu ye igualitariu, con 9 muyeres y 8 homes implicaes nel desencolcu de tol proyectu.

Ampliar públicos

El Semando Fest quier abrir nuevos públicos pa la música asturiana. Al ser un festival onde la mocedá ye la protagonista, busca que’l públicu más mozu conoza los soníos de raigañu d’Asturies y que puea ver como hai rapaces y rapazos de la so mesma edá creando cultura asturiana. Por último, supón un pasu más dientro de los 5 años de camín que Musicasturiana.com cellebra con esti eventu. Una trayectoria qu’entamó col llanzamientu de la tienda online y de la distribuidora dixital (2017), siguió cola creación del ciclu Amosando (2019) y cola reconversión de la web nel mayor portal dedicáu a la música n’asturianu y gallego-asturiano (2021).