Ayeri arrancó la XIX edición del Festival Internacional de la Gaita de Villaviciosa, cuatro díes que faen de la capital maliaya la capital de la música’l país na primer selmana de setiembre. Ente la bayurosa programación destaca’l conciertu 40 aniversariu de la Banda Gaites Villaviciosa «El Gaitero», organizadora d’esti festival. Un montón de collaboradores van andechar con esta formación pa soplar les veles esti sábadu 5 dende les 19h n’El Pelambre, onde va celebrase l’Alcuentru de Bandes de Gaites. P’afondar nello, ayeri falamos con Edu Llosa, director d’esta agrupación.
Pues como tolos años, nes últimes selmanes, nos últimos díes, tamos un poco toos más alteraos de la cuenta, pero lleguen les feches, llega la motivación, lleguen les ganes d’arrancar el festival, de que salga too bien, de facer disfrutar a la xente y la verdá que siempre cumplimos coles espectatives pela nuestra parte y esperemos qu’esta edición, la númberu diecinueve, asina seya.
Pela mio parte, yo llevo na banda 16 años, nun me tocó los primeros años de la organización del festival, pero entiendo que como munches otres bandes compañeres que fueron al festival, al final, foi poles ganes de facer estos hermanamientos ente bandes. Los principales festivales arrancaben por eso, por facer un hermanamientu, por xuntase una tarde pa tocar, pa echar un ratu compartiendo’l trabayu de cada banda y, dempués, a lo meyor, un poco de fiesta cola nueche folk. Y sobre manera yo creo qu’estos últimos años, y nel casu del Festival Internacional de la Gaita, por facer un homenaxe a la gaita asturiana, pero amás a toles variantes de gaita qu’hai pel mundu; porque de fechu tolos años nos presta traer una representación de gaita gallega, asturiana, bretona, irlandesa… a la fin ye una manera de valorar esti instrumentu, porque ye un instrumentu con muncha historia a lo llargo de tol mundu. Con toles actividaes que facemos, en parte munches venceyaes a la gaita, facemos dalgo entreteníu pa la xente, pa dar a conocer y pa disfrutar del instrumentu.
«Los principales festivales arrancaben por eso, por facer un hermanamientu, por xuntase una tarde pa tocar, pa echar un ratu compartiendo’l trabayu de cada banda y, dempués, a lo meyor, un poco de fiesta cola nueche folk»
Básicamente la banda gaites ye d’una manera o otra la organizadora del festival, anque nesti casu tenemos persones que tán un pocoñín más ayenes a la banda, pero al final siguimos llevando’l nome de la banda gaites como representación, como organizadora del festival, y la verdá que presta. Ye un arguyu qu’esta asociación organice esti festival, porque d’estos últimos años pa equí medró muncho, y la verdá qu’ameyorando’l festival, ameyora la banda, y al revés; a la fin ye tou un círculu que se retroalimenta y cada añu va a meyor.
Ye importante sobre manera pol fechu de celebrar los 40 años de camín de la banda y bono, vamos tocar sobre too un repertoriu actual, repertoriu que se tuvo tocando na banda durante estos últimos 40 años, y incluso dalgunes collaboraciones especiales. Amás de tar acompañaos por numberosos músicos, tamién ye por facer daqué distinto a lo que facemos davezu la banda gaites; que seya más que tocar pasucáis, desfiles, procesiones, mises… qu’a la fin ye prácticamente de lo que vivimos equí les bandes de gaites. Entós ye da-y un xiru y facer un espectáculu en escenariu pa la xente, pa que nueda ver que la gaita nun ye namás tocar nuna misa y nuna romería o nun ye namás un desfile y un procesión; que vean que xuntándose con otros músicos pueden facese coses interesantes.
«La banda trabayó mui duro estos meses últimos pa sacar too esto alantre y esperamos que’l conciertu del sábadu salga igual que los ensayos, o meyor, y sobre manera que la xente disfrute, porque llevamos un repertoriu mui variáu, mui representativu de la banda gaites»
Munches d’elles vienen pela parte que me toca como director, porque hai xente cola que llevo yá trabayando años, xente na que confié pa facer esti proyectu, y la verdá que ye xente que resuelve, que tán tamién mui a favor de les idees que queríemos facer con esti conciertu. Y otres munches, tamién son amigos o conocíos de la banda o que por otres razones decidimos que collaboraren como, especialmente, la collaboración con Abéu, grupu del que yo tamién soi miembru como guitarrista y qu’esti añu pal discu que sacamos, K-MUDAR, decidimos facer una collaboración cola Banda de Gaites de Villaviciosa nun tema que se llama ‘LLENÍN – Danza’, qu’amás de ser un éxitu total, el Festival Internacional de la Gaita decidió usar esi cantar como banda sonora d’esta edición. Polo tanto, Abéu nun podía faltar nel conciertu. Tamién vamos tener a Rellume, al grupu folclóricu Prau Llerón, a l’agrupación Lembranza Solpor de Galicia y dempués a tola riestra de músicos que nos van acompañar nel escenariu: Fabián Castro San José, Andrés García Álvarez, Carlos Castro, Adrián J. Argüelles y Javier Menéndez González.
Pues esta idea, polo menos na mio tiesta, que ye d’onde salió la innmensa mayoría de les idees, igual ya yé cosa de dos años trabayando nello; pero sobre manera foi esti añu cuando entamamos a arrancar con too ello: colos arreglos, preparar el repertoriu, etc, porque aparte la banda siguimos manteniéndonos n’activo’l restu l’añu y nun podemos dedicanos esclusivamente a esto, sinón que tenemos que dir alternando.
Estos dos meses últimos yá foi cuando más empezamos a trabayalo, ensayando colos propios músicos y la verdá qu’afortunadamente va salir un conciertu bastante interesante, o polo menos esa ye la sensación que tuvimos nos ensayos. Tenemos muncha suerte de tener mui buenos músicos acompañándonos. La banda trabayó mui duro estos meses últimos pa sacar too esto alantre y esperamos que’l conciertu del sábadu salga igual que los ensayos, o meyor, y sobre manera que la xente disfrute, porque llevamos un repertoriu mui variáu, mui representativu de la banda gaites y creemos que va presta-y a tol mundu.
«Tanto a nivel personal como na carrera profesional, ye una pasada poder facer frente a esto y sobre too que la mesma banda pueda sacar les idees que tenía yo na tiesta y plasmales énte’l públicu»
Yo soi miembru de la banda gaites dende’l 2010, que tamién toqué’l tambor con ellos, y dende’l 2021 soi director musical, y la verdá que llegar a esti puntu, a esti momentu de la banda, nel que lleves el 40 aniversariu y tanto pesu recai sobre tí, la verdá que per un llau ye preocupante, porque fueron meses bastante esmolecedores nel sentíu de facer los arreglos, de que saliera bien, que la xente deprenda’l repertoriu, de sacar toles idees que tenía na cabeza… pero per otru llau, al final ta saliendo too perbién, porque tenemos mui bon equipu musical dientro de la banda y la verdá que, tanto a nivel personal como na carrera profesional, ye una pasada poder facer frente a esto y sobre too que la mesma banda pueda sacar les idees que tenía yo na tiesta y plasmales énte’l públicu. La verdá que ye un honor y un privilexu poder vivir esto.
«A vegaes resulta mui difícil disfrutar cuando tas en plenu agostu a trenta y pico graos, col traxe puestu y soplando la gaita al sol… Ye dalgo mui complicao, pero a base de bon rollu y de saber tratar cola xente y ayudanos unos a otros, algamamos munches coses»
Yo llevo na banda 16 años y la verdá que nos años anteriores, tolo que me cuenten, toles vivencies que tuvo la xente, tamién ves como funciona la banda durante 16 años, al final el funcionamientu foi como una crisis. Como yo lo veo, hubo momentos mui bonos, momentos mui malos, pasó muncha xente, munchos conciertos, munchos viaxes, munches situaciones… pero a la fin la banda siempre se caltuvo nes buenes y nes males, siempre hubo xente que nos bonos momentos tiraba y nos malos tamién. Creo que nesti sen tamién caracterizónos un poco a la xente que tamos agora, dende que garré la dirección -postpandemia, que foi una época mui mala pa toos-, decidimos xuntos unos cuantos pa renovar too y tirar pola banda. Y bueno, llogramos creo que bastantes cosines, sobre manera mantener siempre l’estilu de la banda, caltener la imaxe, la representación del Conceyu de Villaviciosa y por supuesto d’El Gaitero, que ye’l nuestru patrocinador oficial.
Y sobre too, como director, lo principal que yo vi siempre foi que teníemos que disfrutar de tocar, porque a la fin nes bandes de gaites la xente ta de manera voluntaria; la xente nun cobra. Entós, pola mio visión, lo principal yera que la xente disfrutara de tocar y disfrutar de los instrumentos y disfrutar tamién de cuando, digamos, una mañana tas tocando una misa y una procesión, cosa qu’a vegaes resulta mui difícil cuando tas en plenu agostu a trenta y pico graos, col traxe puestu y soplando la gaita al sol… Ye dalgo mui complicao, pero a base de bon rollu y de saber tratar cola xente y ayudanos unos a otros, algamamos munches coses y esperamos que pueda siguir nos próximos años.
«Sí que me prestaría nel FIG dalgo más de presencia de percusión, porque la percusión, anque seya un instrumentu que podemos considerar d’acompañamientu a la gaita, tamién ye un instrumentu superimportante cuando fai esi llabor»
Nun toi al cien por cien metíu na organización del festival. Yo toi, pero un poco perbaxo por tar a otres cuestiones de la banda, pero supongo qu’esti añu agora mesmo nun tean mui pendientes de lo que puea pasar l’añu que vien. En cuantes pase’l FIG la selmana qu’entra entamaráse a organizar too, pero principalmente gustaríame que’l FIG nun baxara del nivel que ta agora mesmo, que nestos últimos años ameyoró munchísimo, y que polo menos se caltuviese o fuese meyor. Siendo un 20 aniversariu obviamente podrá tener munches más actividaes, seguru.
Prestaríame más presencia d’otres gaites qu’hai pel mundu porque ye verdá que polo xeneral tolos festivales solemos llenalos cola presencia de gaites de Galicia, Bretaña, Escocia y Irlanda, pero la presencia de gaites d’a lo meyor el restu d’Europa o d’otros países, qu’hai muncho más; pa que la xente vea hasta ónde aporta l’instrumentu.
Y, per otru llau, pela parte que me toca pola percusión, qu’al final ye’l mio instrumentu, sí que me prestaría dalgo más de presencia de percusión, porque la percusión, anque seya un instrumentu que podemos considerar d’acompañamientu a la gaita, tamién ye un instrumentu superimportante cuando fai esi llabor. Entós pidiría un poco de presencia de la percusión, o incluso d’otros instrumentos que nun seya namás la gaita solista. Pero sobre manera prestaríame que’l FIG siguira esta llinia o a meyor.
Suscríbite a les nuestres novedaes
