Como vien siendo tradición dende va años, la Banda Gaites Villaviciosa «El Gaitero» celebra’l festival de navidá de la so escuela de música tradicional nel Teatru Riera de Villaviciosa. L’actu va ser esti sábadu 13 a les 19.30h, con entrada de baldre, y nél van facese entrega de les distinciones añales que concede l’agrupación y qu’esti añu van dir a Xicu Ariza, responsable de Musicasturiana.com, y a otra persona entá por anunciar.
Nel festival de navidá van facer una amuesa del trabayu fechu’l caberu añu tolos escolinos y escolines de les estremaes especialidaes impartíes: gaita asturiana, tambor tradicional, acordión diatónicu, pandereta y baille. Darréu d’estes actuaciones, va tocar la propia Banda Gaites Villaviciosa «El Gaitero», agrupación que l’añu qu’entra celebra 40 años n’activo.
Nesti eventu tamién van facese entrega de los reconocimientos añales qu’esta banda vien dando en dos estayes: una la de la persona, asociación o entidá destacada na defensa y espardimientu de la cultura y llingua asturianes, qu’anguaño va ser pa Xicu Ariza, periodista y xestor cultual responsable d’iniciatives como musicasturiana.com y d’otros proyectos venceyaos a la música y cultures del país dende la so mocedá; y otra pa la persona, entidá o asociación que destacare pol so sofitu a la banda dende’l so entamu. Nesti últimu casu va ser una sorpresa.
Suscríbite a les nuestres novedaes
