Nueche Folk en L’Infiestu con Rubén Alba y el quebequés Yves Lambert

La música folk vuelve a sonar esti fin de selmana a Piloña. El viernes 8 d’ochobre, a les 22h, na Plaza del Ganáu de L’Infiestu y con entrada de baldre va cellebrase la Nueche Folk na que van actuar el gaiteru Rubén Alba xunto a la so banda y el históricu músicu quebequés Yves Lambert. L’eventu ye tamién la fiesta de cumpleaños d’Actos Pro, empresa asitiada en Piloña que lleva 20 años trabayando na representación artística y producción d’eventos especializaos na música celta y world music.

Rubén Alba ye un gaiteru avilesín ganador del Trofeo Macallan nos años 2002 y 2006. Amás de los concursos, la so llarga trayectoria llevólu a ser escoyíu p’actuar como gaiteru solista nel prestixosu festival “Piping Live Festival” celebráu en Glasgow en 2012. Tres participar en delles festivales de gaita internacionales entama’l so camín como músicu solista en delles formaciones y collabora con varios grupos (Gwendal, Juan Carlos Mendoza…). En 2018 asoleyó ‘Despertar’, el so primer álbum en solitario.

Yves Lambert ye ún de los músicos quebequenses más reputaos dientro y fuera del so país. Cantante y acurdión de los míticos La Bottine Souriante ente 1976 y 2002, al añu siguiente entamó la so carrera en solitario. Col so folk quebequés influenciáu pola música celta, ye un gran esponente de la world music per tol planeta.

Compra na tienda online discos de música folk asturiana