El Ministeriu de Verbenes convocó y, como siempre, trunfó. Ayeri Rodrigo Cuevas presentó nos Cines Embajadores Foncalada d’Uviéu Llagares, el curtiumetraxe musical formáu por trés temes que son un adelantu nuevu del so próximu discu, Manual de Belleza. Esta obra d’arte audiovisual creada por Jorge Rojas ye un homenaxe al programa de RTVE Cantares que dirixó Lauren Postigo en 1978 y pel que pasaron mítiques folclóriques españoles. Nel actu d’esti miércoles, la más grande de les folclóriques asturianes proyectó y faló de la so nueva creación nun pase priváu pa un públicu formáu por parte del equipu responsable d’esti proyectu y delles personalidaes de la cultura asturiana. Esti xueves 5 estrénase’l videu en YouTube y les canciones en plataformes musicales como un EP.
«La calidá, l’humor, la identidá asturiana y el trabayu colectivu definen a esta película musical na que, amás de Rodrigo Cuevas y los sos músicos y baillarines habituales, collaboraron Rossy de Palma, Ana Belén, Grande Amore y componentes de la Banda de Música de Pravia. Tamién ficiéronla posible 103 figurantes y un llargu staff»
La calidá, l’humor, la identidá asturiana y el trabayu colectivu definen a esta película musical na que, amás de Rodrigo Cuevas y los sos músicos y baillarines habituales, collaboraron Rossy de Palma, Ana Belén, Grande Amore y componentes de la Banda de Música de Pravia. Tamién ficiéronla posible 103 figurantes y un llargu staff -que va dende «l’equipu de panoyismu» hasta responsables de producción- qu’andecharon pa crear una obra de más de quince minutos de duración, grabada n’analóxico en 16 mm y que Rodrigo Cuevas definió como «Anti IA y anti comercio, pero mui guapa». Nella, el llagar de sidra Cortina de Villaviciosa conviértese en La Panoya Dorada, el plató de Llagares y l’actriz Rossy de Palma –«pensamos nella dende l’entamu; animó a tol mundu, facía chancies…», desplicó Cuevas- conduz col so característicu xeitu’l programa.
Too entama con ‘Sácame a bailar’, un pasudoble español nel que Tino Cuesta -componente del grupu de Rodrigo Cuevas y director de la Banda de Música de Pravia- dirixe a miembros d’esta formación y al percusionista Juanjo Díaz mentanto’l públicu bailla a lo agarrao. El tema remata con un planu d’un bodegón mientres se siente la voz d’Ana Belén, collaboradora del cantar que, como nun pudo grabar el videu, retayóse parte de la so participación pa qu’en plataformes musicales pueda sentise l’audio cola collaboración completa.
Llueu aporta’l momentu de la primer entrevista de Rossy de Palma a Rodrigo Cuevas. Nella l’axitador cultural fala de los sos primeros besos y romeríes en Rodiezmo, de la emigración a Barcelona, del amor y la señaldá por Asturies… Y ye entós cuando xente qu’anda pel Mercáu de Piloña respuende a les entrugues de reporteristes de caleya al rodiu Cuevas, la so figura y lo que supón pa L’Infiestu. Puru costumismu qu’enllena esti momentu d’humor y d’arguyu pola xente de pueblu enantes de que llegue’l segundu tema: ‘Asturcón’.
«‘Asturcón’ ye’l primer cantar que Rodrigo Cuevas interpreta nun asturianu normativu dafechu y les imáxenes ilustren el momentu más caliente del curtiumetraxe, con un “desnudu con cuasi lipotimies” protagonizáu por un tríu caracterizáu como bandoleros al estilu Curro Jiménez»
Pop, electrónica y usu d’autotune resumen musicalmente esti cantar nel que Rodrigo Cuevas fala en primer persona de «un asturcón que namás quier que lu monten». La canción ye la primera qu’esti artista interpreta nun asturianu normativu dafechu y les imáxenes ilustren el momentu más caliente del curtiumetraxe, con un «desnudu con cuasi lipotimies» protagonizáu por un tríu caracterizáu como bandoleros al estilu Curro Jiménez. Cuevas cuerre cuasi en porrica pela playa Xagó, pero choca que nun cabalgue’l caballu que sal nesti fragmentu, daqué que desplicó tirando de rises y anecdotariu: «enantes de grabar el caballu tiró al dueñu, escapóse…» asina que’l ministru de verbenes prefirió nun arriesgar.
«Yo pienso cantar hasta que muerra». Ye una de les grandes frases que Rodrigo Cuevas espeta a Rossy de Palma na última conversación que tien con ella y qu’introduz ‘Una muerte ideal’, pieza que zarra Llagares. La lletra –n’asturianu, castellanu, llatín y gallegu– ta inspirada nel llibru d’Irene Solá Te di ojos y miraste las tinieblas, obra que según comentó l’artista «fala de la muerte como una sensación lliberadora y maraviyosa». Con esti tresfondu suena’l cantar más punk que fizo’l músicu na so trayectoria, con una potente base rítmica que convida a facer pogu na qu’hai influencies electróniques. La colectividá define tamién a esta pieza: nél homenaxea a figures mítiques del pop español que van dende Bisbal a Nino Bravo y andechen Mapi Quintana con un coru en llatín –«nun ye polo de Rosalía, nós grabámoslo enantes» esclarió Cuevas-, l’artista gallegu Grande Amore, y los baillarines habituales del axitador folclóricu pa interpretar una coreografía creada por Pablo Dávila. Acaba’l cantar y (cuasi) tol mundu muerre envelenáu pola sidra que bebieron nesti corte desenfrenáu. Rossy de Palma echa’l pieslla y remata Llagares.
«»Yo pienso cantar hasta que muerra”. Ye una de les grandes frases que Rodrigo Cuevas espeta a Rossy de Palma na última conversación que tien con ella y qu’introduz ‘Una muerte ideal’, cantar con una lletra n’asturianu, castellanu, llatín y gallegu inspirada nel llibru d’Irene Solá Te di ojos y miraste las tinieblas»
Pero como dicen les buenes cinéfiles, “hai que quedar hasta los creitos”. Y ye que nesta última parte la identidá asturiana qu’acompaña a tola película xorrez tovía más. Mentanto suena ‘Asturias’ d’Isaac Albéniz van pasando imáxenes que retraten elementos d’esti país: corderos a la estaca, una esfoyaza, baille tradicional, la siega, el llar… un reflexu de lo que somos y que Rodrigo Cuevas amuesa y comparte énte’l mundu pa poner el ramu a esta gran obra.
L’aplausu del públicu tres de la primer proyección sintióse per tola Avenida Xeneral Elorza. Rodrigo Cuevas volvió a encandilar nesti pase en petit comité nel que convidó a artistes como Marisa Valle Roso, Beatriz de Grupo Beatriz o’l raperu Enol; escritores como Aitana Castaño o Blanca Fernández Quintana; comunicadores como Asturxules y Enar Areces de Puru Remangu; figures institucionales como Antón García, Director d’Acción Cultural y Normalización Llingüística del gobiernu asturianu, Lucía Herrera, directora d’antena de RTPA, o Rocío Antela, ex conceyala de Cultura de Mieres… Dempués del momentu de la pausa «pa comer unes palomites y beber unes cerveces« fíxose un segundu pase nel que poder ver meyor tolos detalles de los que faló Rodrigo Cuevas enantes de qu’esti xueves s’estrene Llagares en toles plataformes.
«Nos creitos, mentanto suena ‘Asturias’ d’Isaac Albéniz, van pasando imáxenes que retraten elementos d’esti país: corderos a la estaca, una esfoyaza, baille tradicional, la siega, el llar… un reflexu de lo que somos y que Rodrigo Cuevas amuesa y comparte énte’l mundu»
L’eventu d’ayeri aportó dempués de dos selmanes na que’l ministru de verbenes foi dando novedaes. Per un llau, pudo volver a sentise la so voz nuna grabación gracies a la collaboración que fai en ‘Seis pardales’, tema del discu nuevu de Nacho Vegas –Vidas semipreciosas– nel que tamién collaboren L-R y nel que canten en solidaridá coles 6 de La Suiza. Pel otru, publicó la portada que Ricardo Villoria creó pa ilustrar el so próximu discu ‘Manual de Belleza’. Tres del estrenu d’esti xueves, van siguir llegando más novedaes d’un trabayu que va poder vese n’escena per primer vez el próximu 24 y 25 d’abril nel Pabellón de La Magdalena d’Avilés.
Semeyes cedíes Nay Semeya.
Suscríbite a les nuestres novedaes
