Esti domingu 6 d’agostu arranquen les fiestes de Xixón y, pa dir caleciendo l’ambiente, la villa de Xovellanos acueye cuatro eventos nos que la cultura tradicional ye la protagonista: el XXIII Festival Internacional de Bandes Gaites Villa de Xixón del 2 al 6 d’agostu; el Festival Folclórico Internacional del 2 al 4; la final del 41 Concurso de Canción Asturiana El Comercio los díes 3 y 4; y el Día d’Asturies en Xixón el 6 d’agostu. Esi mesmu día ye’l pregón d’una Semanona na que, a diferencia d’anteriores ediciones, nun hai actuaciones d’artistes n’asturianu nin na Plaza Mayor nin en Poniente.
El Festival de Bandes de Gaites entama esti miércoles 2 a les 20h en Begoña cola actuación de la Banda Gaites Villa de Xixón, organizadora del eventu. Otres bandes asturianes (BG Infantil La Magüeta y BG Jovellanos), catalanes (BG Rosalía de Castro), bretones (Bagad Men Glaz) y madrilanes (BG Lume de Biqueira) van participar nesti festival que va tener una folixa el sábadu 5 nel Muséu del Pueblu d’Asturies en Xixón na qu’a partir de les doce la mañana va haber actuaciones de les bandes de gaites, taller de danza bretona, xuegos asturianos, amuesa de baltu y los conciertos de Lume Celtic Band a les 20h y de Burbús a les 21h. El desfile del Día d’Asturies en Xixón que sal a les 12h de la Plaza Mayor y va hasta L’Atalaya y una gala na Plaza Mayor a les 21.45h con toles bandes de gaites participantes, ponen el ramu a la ventirés edición d’esti festival
Tamién el día 3 entama’l Festival Folclórico Internacional de Gijón nel que durante tres díes actúen na Plaza Mayor a les 22h agrupaciones de dientro y fuera d’Asturies. Representando al país van tar l’Agrupación Folclórica Los Xustos (miércoles 2), el Grupu Folclóricu Xolgoriu (xueves 3) y el Grupu Folclóricu Trebeyu (vienres 4).
Tamién la Plaza l’Ayuntamientu acueye los díes 3 y 4 les finales de la 41 edición del Concurso de Canción Asturiana El Comercio. Los finalistes que van actuar repartíos ente los dos díes son Liliana Castañón Cerceda (Mieres del Camín), Lorena Corripio López (Colunga), María Luisa Martínez Suárez (Xixón), Aurora Platas Yáñez (Mieres), Águeda Riera González (Villaviciosa), Tatiana Suárez Díaz (Xixón), Alicia Villanueva Megido (Bimenes), Andrés Cueli Robledo (Villaviciosa), Álvaro Fernández Conde (Cantabria), José García García (Cangas), Cesar González Fernández (Somiedu), Celestino Rozada Tamés (Llanes), Isaac Sierra Longo (Parres) y Esteban Verdeja Martínez (Cantabria).
Ensin programación contemporánea n’asturianu
La destacada presencia de la cultura tradicional nestes cites clásiques y imprescindibles del branu xixonés contrasta cola ausencia d’artistes asturianos y n’asturianu dientro de la programación de la Semanona que va durar del 6 al 15 d’agostu. A diferencia del añu pasáu, onde tocaron Los Berrones y Rodrigo Cuevas nel escenariu de Poniente ente más de 30.000 persones, esti añu la corporación saliente de la FSA-IU nun programó nenguna actuación contemporánea n’asturianu y la presencia d’artistes d’Asturies reduzse a la participación del premiáu freestyler Gazir na Batalla de Gallos de RedBull y al clásicu conciertu del Grupo Assia la nueche de los fuegos.
Suscríbite a les nuestres novedaes
