El vienres 26 de xunetu a les 11:30 hores, na Casa de la Cultura d’Avilés, va facese la presentación pública del llibru Antología Coral Asturiana – Músicas del XXI para el XXI. La obra foi diseñada y dirixida por Guillermo Martínez Vega y David Pérez Fernández, y tien como oxetivu rellanzar la música coral asturiana al traviés de nueves creaciones de destacaos compositores corales, tanto asturianos como internacionales. En total son 34 pieces orixinales basaes nel folclor asturianu, feches por 18 compositores sobre testos d’escritores del país, tanto n’asturianu como en castellanu, ente ellos Roberto González-Quevedo, Esther Prieto, Ánxel Álvarez Llano, Inaciu Galán o Mª Esther García.
Esta collaboración lliterario-musical reflexa nes lletres histories y lleendes d’Asturies qu’evoquen la so vida rural, costumes, lluches y guapura del so paisaxe; amás, amiéstase tamién un estudiu musicolóxicu qu’arriquez la publicación alredor de lo que supón d’innovación esta obra y de la llarga tradición de la música coral asturiana. Antología Coral Asturiana quier da-y puxu y promover la iniciativa coral nel nuestru país, apostando pola so cultura y por un futuru musical rellumante.
El llibru ta pensáu por y pal pueblu asturianu, poro, la so distribución va ser de baldre, mesmo nel formatu físicu como nel dixital, col aquel de que les agrupaciones corales asturianes puedan anovar el so repertoriu incorporando dalguna de les pieces d’esta nueva lliteratura coral. En pallabres de los sos coordinadores: «Qué duda cabe que vivimos tiempos de grandes cambios y es por ello que esta Antología busca presentarse ante la sociedad asturiana como una respuesta a sus necesidades musicales apostando por un lenguaje renovado y actual que le haga atractivo su acercamiento al mismo tiempo que ambiciona atender el tejido coral, ávido de nuevas fórmulas y horizontes musicales».
La tradición coral n’Asturies
La música coral asturiana fai parte de la tradición sonora del país dende hai más de cien años, cuando a principios del sieglu XIX escomenzaron a formase conxuntos d’estes característiques (cuartetos, ochotes, etc.). Ehí entama una estaya de la música asturiana que diba enraigonar fondamente, creando un repertoriu con pieces icóniques que llograron el preste del públicu. Grandes compositores del país crearon temes pensaos pa ser cantaos por agrupaciones corales (Torner o Sergio Domingo seríen dos bonos exemplos), asina como escritores de la época (casu de Pin de Pría o Marcos del Torniello); otra manera, tamién dellos de los intérpretes de l’asturianada güei consideraos clásicos pasaron per formaciones corales, casu de Cuchichi, Claverol, Miranda y Botón -que dempués crearíen el grupu Los Cuatro Ases-, Xuacu’l de Sama, Quin el Pescador o Juanín de Mieres.
Como toa espresión musical, la coral tamién precisa de creaciones nueves qu’aseguren la so creatividá y permanencia. N’Asturies, otros campos de la nuestra tradición, como la gaita, la tonada o la pandereta, esperimentaron una renovación fonda que-yos permitió adaptase a la contemporaneidá y columbrar un futuru granible. La obra qu’agora se presenta puede ser un mui bon puntu de partida pa da-y savia nuevo a la música coral asturiana.
Suscríbite a les nuestres novedaes
